U Rasii ŭrahan źniščyŭ hałoŭnaje dreva krainy. Jaho pasadziŭ viadomy piśmieńnik FOTAFAKT
U Arłoŭskaj vobłaści ŭ muziei-zapaviedniku piśmieńnika Ivana Turhienieva Spaskaje-Łutavinava z-za ŭrahanu pavaliŭsia 198-hadovy Turhienieŭski dub — škvalisty viecier litaralna vyrvaŭ 30-mietrovaje dreva ź ziamli, paviedamlajecca na sajcie muzieja.
Fota z sajta muzieja
«Dla ŭsich, chto lubić Spaskaje, dla kalektyvu muzieja, dla mianie asabista heta niezamiennaja strata, jakuju pakul ciažka ŭśviadomić. Dub, pasadžany Ivanam Siarhiejevičam Turhienievym, byŭ nie prosta hałoŭnaj pryrodnaj słavutaściu siadziby, heta byŭ žyvy simvał lubovi da Radzimy. Pastajać pad jaho kronaj i pakłanicca jamu — pa zapaviecie Turhienieva — ludzi pryjazdžali z samych dalokich kutkoŭ Rasii i śvietu», — napisaŭ dyrektar muzieja Siarhiej Stupin.
Turhienieŭski dub z 2014 hoda byŭ uniesieny ŭ rejestr staraŭzrostavych dreŭ Rasii. Ličycca, što hety dub, jaki zhadvajecca Ivanam Turhienievym u listach i zapisach, byŭ pasadžany piśmieńnikam u padletkavym uzroście padčas adnaho z pryjezdaŭ u radavy majontak.
U 2021 hodzie Turhienieŭski dub byŭ pryznany hałoŭnym drevam krainy. U lutym 2022 hoda jon pavinien byŭ udzielničać u konkursie «Jeŭrapiejskaje dreva hoda».
