Pravaabaroncy paviedamlajuć pra pieratrusy pa ŭsioj Biełarusi
Pieratrusy adbyvajucca, jak u Minsku, tak i ŭ Viciebsku, Homieli, Mazyry, Kryčavie, paviedamlaje «Viasna».
Ilustracyjnaje fota
Z samaj ranicy 1 śniežnia pa ŭsioj Biełarusi adbyvajucca pieratrusy. Na hety momant pravaabaroncam «Viasny» viadoma pra vobšuki ŭ mazyrskaha pravaabaroncy Uładzimira Cielepuna, u aktyvistaŭ ź Viciebska Uładzimira Kijko i Mikałaja Kačurca, a taksama ŭ kryčaŭskaha žurnalista Siarhieja Niaroŭnaha. U Homieli pryjšli da žurnalistki Łarysy Ščyrakovaj, a paśla pieratrusu jaje pavieźli na dopyt.
Akramia hetaha, z 7 ranicy prachodziać pieratrusy ŭ Minsku.
Pa infarmacyi pravaabaroncaŭ, z vobšukami pryjšli minimum da 10 čałaviek.
U pryvatnaści prajšoŭ pieratrus u hrodzienskaj žurnalistki Nadziei Vicinaj. Jana zatrymanaja jak śviedka «pa niejkaj spravie, u jakim fihuruje jaje asabistaja pierapiska».
U Breście ranicaj supracoŭniki milicyi pryjšli da Aleny Žušma.
Taksama viadoma pra pieratrus u rečyckaha aktyvista Aleha Karbaleviča. Siłaviki zabrali jaho kampjutar, a jaho pavieźli ŭ RAUS.
Stali viadomyja padrabiaznaści pieratrusu ŭ mazyrskaha pravaabaroncy Uładzimira Cielapuna. Ranicaj supracoŭniki milicyi praviali vobšuk na lecišcy Uładzimira, a ciapier pajechali na jaho kvateru. Techniku paśla pieratrusu nie zabirajuć, a tolki znački «Viasny», knihi, paštoŭki i płakaty.
Pradstaŭniki jakoha viedamstva pravodziać pieratrus — pakul nieviadoma.
Adbyvajecca pieratrus u Vasila Palakova — homielskaha palityka i hramadskaha dziejača AHP
Pieratrus u žurnalistki Łarysy Ščyrakovaj u Homieli doŭžyŭsia blizu 1,5 hadzin, jaho praviali supracoŭniki DFR. U žurnalistki zabrali telefon, aparaturu, fłeški i dyski.
Paśla pieratrusu jaje dapytali ŭ DFR. Jana admoviłasia adkazvać na pytańni.
Ščyrakovu vusna papiaredzili ab adkaznaści za vydavańnie materyjałaŭ spravy, tamu padrabiaznaści pravaabaroncam jana nie raspaviała.
