Prakurorka zapatrabavała pakarać maci piaciarych dziaciej Volhu Załatar piaćciu hadami kałonii
U Minskim haradskim sudzie 29 listapada praciahnuŭsia sud nad palitźniavolenaj maci pieciarych dziaciej Volhaj Załatar.
Siońnia prakurorka Žanna Baranava zaprasiła pakarańnie dla źniavolenaj šmatdzietnaj maci — piać hadoŭ pazbaŭleńnia voli va ŭmovach ahulnaha režymu, paviedamlajuć pravaabaroncy.
Joj staviać u vinu nastupnyja artykuły Kryminalnaha kodeksa: č. 1 art. 361-1 (stvareńnie ekstremisckaha farmavańnia), č. 1 i 2 art. 342 (navučańnie asob dla arhanizacyi dziejańniaŭ, jakija hruba parušajuć hramadski paradak), č. 1 art. 16 č. 1 art. 342 (dapamahańnie ŭ arhanizacyi dziejańniaŭ, jakija hruba parušajuć hramadski paradak).
Volha nie pryznaje vinu ni pa adnym artykule Kryminalnaha kodeksa.
Palitźniavolenuju abvinavačvajuć u tym liku ŭ stvareńni ekstremisckich farmavańniaŭ — telehram-čataŭ «Ždanovičy siońnia», «Ždanoviči 2020 — kłub lubitielej piesien Coja», jakija ŭłady pryznali ekstremisckimi praź siem miesiacaŭ paśla zatrymańnia Volhi.