Stajnia Pusłoŭskich u Słonimie pradadzienaja za 67 tysiač dalaraŭ
Budynak byłoj stajni Pusłoŭskich u mikrarajonie Słonima Albiarcin byŭ vystaŭleny na aŭkcyjon. I niadaŭna znajšoŭsia pakupnik, jaki vykupiŭ byłuju stajniu Pusłoŭskich krychu bolš za 67 tysiač dalaraŭ. Chto vykupiŭ budynak i što tam budzie znachodzicca — pakul nieviadoma, paviedamlaje budzma.by
Stajnia — pomnik historyka-kulturnaj spadčyny Biełarusi. Jana ŭvachodzić u kompleks siadziby Pusłoŭskich u Albiarcinie. Stajnia, jak i sam pałac, flihiel, šerah pradpryjemstvaŭ byli pabudavanyja ŭ pieršaj pałovie XIX stahodździa. Tady ŭ Albiarcinie pobač byŭ zakładzieny i vialiki park z redkimi parodami dreŭ.
Paśla Druhoj suśvietnaj vajny pałac i stajnia Pusłoŭskich naležali Słonimskamu kardonna-papiarovamu zavodu. Potym u stajni zrabili moładzievy centr adpačynku, a ŭ apošni čas jana pustavała.
