Kiraŭnik BPC Vienijamin zaklikaŭ stavicca da mihrantaŭ jak da «pryšelcaŭ»
Mitrapalit Minski i Zasłaŭski Patryjaršy ekzarch Biełarusi Vienijamin zaklikaŭ biełarusaŭ i žycharoŭ jeŭrapiejskich krain prajavić miłasernaść i spačuvańnie da «zachrasłych» na biełaruska-polskaj miažy mihrantaŭ i paraŭnaŭ ich z «pryšelcami», piša Interfax.by.
«Da ich treba stavicca, jak da «pryšelcaŭ». Mienavita tak Stary Zapaviet zaklikaje stavicca da ŭsich vandroŭnikaŭ u našym žyćci. Biblija kaža, što i my pryšelcy na hetaj ziamli, jak i mnohija baćki našyja. Tamu ŭ adnosinach da vandroŭnikaŭ i pryšelcaŭ treba prajaŭlać miłasernaść i spačuvańnie, u składanuju chvilinu ich padtrymać i zabiaśpiečyć ich chlebam», — raspavioŭ jon u sieradu padčas pres-kanfierencyi ŭ Minsku.
Kiraŭnik BPC adznačyŭ, što, zhodna z relihijnym vučeńniem, usie ludzi, pražyŭšy žyćcio na ziamli, buduć davać adkaz za ŭłasnyja ŭčynki pierad Boham, i zaklikaŭ usich, ad kaho zaležyć mihracyjny kryzis i losy ludziej na miažy, dapamahčy im.
«Chaciełasia b, kab usie pajšli nasustrač hetym biednym ludziam, jakija apynulisia ŭ takoj situacyi. Tym bolš, što nabližajecca Rastvo Chrystova, chutka pačynajecca Kaladny post, čas smutku, kali vierniki robiać dobryja spravy», - nahadaŭ jon.
«Tak, vielmi važna i nakarmić, i apranuć hetych ludziej. Ale jašče važniej vyrašyć samu prablemu», — dadaŭ mitrapalit.
