«Da kanca zimy ŭsie ŭ Niamieččynie buduć albo pryščeplenyja, albo pierachvareŭšyja, albo miortvyja». Niemcy čakajuć piku kavidu
Ministr achovy zdaroŭja Niamieččyny Jens Špan nie cyrymoniŭsia, kali tłumačyŭ, nakolki važna pryščaplacca. Pra adnu z samych małavakcynavanych krain Zachodniaj Jeŭropy piša BBC.
Fota: pixabay.com
Niamieččyna pieražyvaje čaćviortuju chvalu karanavirusa, kolkaść vypadkaŭ zachvorvańnia raście štodnia i mnohija špitali ŭžo całkam zapoŭnienyja.
U Niamieččynie adzin z samych nizkich adsotkaŭ vakcynavanaści nasielnictva ŭ Zachodniaj Jeŭropie — na siońnia tam pryščapilisia 68% žycharoŭ krainy.
Miedyki pradkazvajuć, što hetaja čaćviortaja chvala karanavirusa budzie najhoršaj.
Za paniadziełak u Niamieččynie było zarehistravana 30 tysiač novych vypadkaŭ infiekcyi, što na siem tysiač bolš, čym u toj ža dzień tydzień tamu. Heta adzin z samych vysokich rejtynhaŭ u śviecie.
Nieŭzabavie buduć ŭviedzienyja bolš strohija praviły, pavodle jakich nievakcynavanym nielha budzie źjaŭlacca ŭ hramadskich miescach, a niekatoryja słavutyja niamieckija kaladnyja kirmašy ŭžo skasavanyja.
Špan suprać taho, kab vakcynacyja była abaviazkovaj, ale jon nazvaŭ pryščepku «maralnym abaviazkam», pakolki ad uzroŭniu vakcynavanaści zaležyć zdaroŭje inšych ludziej.
«Svaboda praduhledžvaje adkaznaść, i ŭ kožnaha jość abaviazak pierad hramadstvam — pryščapicca», — skazaŭ jon.
Ministr taksama skazaŭ, što štam Delta nastolki vysokazarazny, što «ŭsie, chto nie pryščapiŭsia, ciaham nastupnych miesiacaŭ zaraziacca».
Da kanca tydnia Jeŭrapiejski Sajuz musić uchvalić vakcynacyju dziaciej ad 5 da 11 hod.
Z pačatku pandemii ŭ Niamieččynie pamierła bolš za 99 tysiač čałaviek.
Piać z pałovaj miljonaŭ niemcaŭ pierachvareli na kavid.