Stali viadomyja detali avaryi aŭtobusa ŭ Bałharyi, u jakoj zhareli 45 čałaviek
Aŭtobus, jaki trapiŭ u avaryju na aŭtamahistrali Struma ŭ Bałharyi, moh zaharecca z-za sutyknieńnia z darožnym znakam. Pra heta zajaviŭ sakratar Rady biaśpieki Piernickaha rajona, kala jakoha adbyłosia DTZ, Vaśka Pirhaŭ, paviedamlaje bałharskaje vydańnie Tribune.
tribune.bg
Kiroŭca aŭtobusa, vierahodna, pieravysiŭ chutkaść i najechaŭ na darožny znak pravym piarednim kołam. Adnak jon nie adreahavaŭ na incydent, pry hetym moh być paškodžany i paliŭny bak, ukazaŭ Pirhaŭ. Pry treńni mietału pierad aŭtamabilem utvarylisia iskry, u vyniku adbyŭsia pažar.
Pa słovach čynoŭnika, aŭtobus moh zhareć za 2-3 chviliny.
«Ja takoha jašče nie bačyŭ, ludzi ŭnutry całkam zhareli», — skazaŭ ministr unutranych spraŭ Bałharyi Bojka Raškaŭ. Pa jaho słovach, asoby zahinułych jašče treba budzie vyśvietlić. Pavodle papiarednich źviestak, siarod zahinułych i paciarpiełych jość dzieci, usiaho ŭ aŭtobusie jechali 52 čałavieki.
Cieły achviar zhareli da niepaznavalnaści, apaznać ich, chutčej za ŭsio, budzie mahčyma tolki pa vynikach DNK-ekśpiertyzy, skazaŭ dyrektar Nacyjanalnaj śledčaj słužby Bałharyi Barysłaŭ Sarafaŭ.
Ruch mašyn pa aŭtamahistrali Struma, dzie adbyłosia DTZ, prypynili na ŭvieś dzień.
Raniej paviedamlałasia, što aŭtobus jechaŭ sa Stambuła ŭ Paŭnočnuju Makiedoniju.
U DTZ z turystyčnym aŭtobusam u Bałharyi zahinuli 45 čałaviek
