Žyćcia biez kavidu nie budzie. Z nadychodam zimy ŭ ZŠA čakajuć pik zachvorvańniaŭ
Amierykanskija daśledčyki pradkazvajuć, što da viasny 2022 u ZŠA pamre 1 miljon čałaviek ad karanavirusa. Heta źviazvajuć z małoj dolaj vakcynavanych — ich u krainie 60%, piša «Hardzijan».
Fota z Pixabay.com
Miedyki bjuć u zvany: u Jeŭropie ŭžo pačaŭsia rezki skačok zachvorvańniaŭ (na siońnia na Jeŭropu prypadaje dźvie treci ŭsich vypadkaŭ zachvorvańniaŭ u śviecie), a heta značyć, što nieŭzabavie pik pačniecca i ŭ ZŠA. Tym nie mienš, u miedykaŭ jość nahoda i dla aptymizmu.
Pa-pieršaje, vakcynacyja źnižaje śmiarotnaść i nieabchodnaść kłaści pacyjenta ŭ špital. Pryščepka ŭ hetym sensie efiektyŭnaja na 85%. A 90% z tych, chto pamiraje ci traplaje ŭ reanimacyju, byli nie pryščeplenyja.
Heta značyć, što ŭ druhuju zimu pandemii nie daviadziecca bačyć pierapoŭnienyja morhi i adździaleńni intensiŭnaj terapii.
Druhaja nahoda dla aptymizmu siarod amierykanskich daktaroŭ źviazanaja z vakcynacyjaj dziaciej. Ciapier jany bolš nie buduć pieranosčykami infiekcyi.
Narešcie novyja antyvirusnyja leki abiacajuć pieratvaryć karanavirus na infiekcyju, jakoj možna dać rady.
Na Zachadzie ŭžo pieraasensavali značeńnie frazy «poŭnaściu vakcynavany»: ciapier heta abaznačaje, što čałaviek atrymaŭ try pryščepki, a nie dźvie, jak raniej. Tym nie mienš, bustarnyja (dadatkovyja) pryščepki — heta nie samy efiektyŭny sposab spynić raspaŭsiud karanavirusa, razumiejuć ciapier navukoŭcy. Samy efiektyŭny — heta pierakanać niepryščeplenych ludziej pryščapicca.
Ekśpierty ciapier ličać, što karanavirus stanie endemičnym zachvorvańniem (zachvorvańniem, charakternym dla peŭnaj miascovaści) i zastaniecca z nami na dziesiacihodździ. Chiba praz šmat hadoŭ infiekcyja stanie prosta mienš ciažkaj.
«Pandemija karanavirusa moža nikoli nie «skončycca», jak mnohija spadziavalisia na pačatku pandemii», — kaža doktar Daŭdzi, dacent kafiedry epidemijałohii Univiersiteta Džonsa Chopkinsa.
Pytańnie ciapier staić pa-inšamu: kali my zmožam dabicca taho, kab hety virus staŭ znosnym dla nas jak dla hramadstva?
A žyćcia biez karanavirusa ŭžo nie budzie nikoli.