Były viazień «Akreścina» raskazaŭ, u jakich umovach utrymlivalisia chłopcy, jakich aryštavali za ŭklučanyja la izalatara «Mury»
U pieršaj pałovie kastryčnika kala Akreścina zatrymali dvaich chłopcaŭ, jakija pad ścienami izalatara ŭ mašynie ŭklučyli pieśniu «Razbury turmy mury». Były aryštant, jakomu daviałosia paznajomicca z adnym z zatrymanych, raspavioŭ «Viaśnie», što chłopcaŭ trymali ŭ karcary ŭ niečałaviečych umovach.
Pra chłopcaŭ amal niama nijakaj infarmacyi. Viadoma tolki, što adnamu ź ich kala 25 hadoŭ i na ich było składziena minimum pa dva pratakoły. Na pačatak listapada jany znachodzilisia za kratami ŭžo miesiac.
Ich zatrymali prykładna ŭ pačatku kastryčnika za toje, što jany padjechali da CIPa na Akreścina na elektramabili Tesla i ŭklučyli «Mury». Ci vyjšli jany ciapier na volu — nieviadoma. Voś što raspaviadaje były aryštant:
«U dzień majho vyzvaleńnia [5 listapada], ranicaj, usiu našu kamieru z rečami vyvieli i pieraviali ŭ IČU. Miarkujem, pryjazdžaŭ Kubrakoŭ i heta była «pakazucha» dla jaho (heta pa čutkach, za hetuju infarmacyju ja nie adkazvaju).
Ciapier toje, što ja bačyŭ na svaje vočy: pierad tym, jak ź CIPa kinuć u kamieru ŭ IČU, my źniali abutak, tapački pieraadzieć nie paśpieŭ, tvaram uniz paviali ŭ kamieru basanož i pryviali, jak akazałasia, u karcar. U karcary znachodziłasia razam z nami vosiem čałaviek.
Sam karcar prykładna 3ch3 mietry. Padłoha bietonnaja. Škonku ad ściany adšpilvać zabaroniena, tamu zatrymanyja śpiać na bietonnaj padłozie. U toj dzień chłopcy jeli biez łyžak, im nie dali harbaty.
U samoj kamiery ciomna, i jana nahadvaje padvalnaje pamiaškańnie. Pieraharodki ŭ tualecie adsutničajuć. Akno možna trochi adkryć, ale soniečnaje śviatło nie zachodzić u kamieru. Nielha siadzieć i dakranacca śpinaj da ściany, možna tolki stajać.
U kamiery niama srodkaŭ asabistaj hihijeny, akramia nievialikaha kavałačka myła. Kali padčas šmonu chtości pakinie «lišniuju» koftu — jaje zabirajuć.
Takich kamier, jak ja zrazumieŭ, dźvie. U adnoj ź ich znachodzicca adzin chłopiec za pieśniu, u druhim takim ža karcary — jaho siabar. Akramia hetych chłopcaŭ, utrymlivalisia zatrymanyja jašče pa art. 342 KK (ciapier, chutčej za ŭsio, ich užo pieraviali ŭ SIZA), a taksama ź imi ŭtrymlivaŭsia mužčyna za raśpićcio ałkaholu. Tak, CIP mnie padaŭsia sanatoryjem u paraŭnańni z hetym śvinarnikam, u jakim utrymlivacca ludzi».
