Finy chočuć zrabić zarobki prazrystymi, kab kalehi viedali, chto kolki zarablaje. Voś navošta heta
U Finlandyi rychtujecca zakonaprajekt, jaki dazvolić lubomu čałavieku pacikavicca zarobkam kalehi. Navošta heta, piša Reuters.
Fota: Depositphotos
U 2020 hodzie, zhodna z vynikami daśledavańnia Arhanizacyi ekanamičnaha supracoŭnictva i raźvićcia, finskija žančyny zarabili na 17,2% mienš za finskich mužčyn.
Pa vynikach hetaha daśledavańnia Finlandyja apynułasia na 37-m miescy pa roŭnaści apłaty pracy, niahledziačy na toje, što pytańnie hiendarnaj roŭnaści ŭžo niekalki dziesiacihodździaŭ zastajecca na paradku dnia ŭ Finlandyi.
Susiedki značna abahnali krainu — Narviehija apynułasia na 8-m miescy, Danija na 9-m, a Šviecyja na 12-m.
Pryčyny takoha niaradasnaha raskładu tradycyjnyja: padzieł rynku pracy na mužčynskija i žanočyja prafiesii, taty mienš siadziać u dekrecie, žančyn nie pavyšajuć pa karjernaj leśvicy tak lohka, jak mužčyn.
«Było niamała vypadkaŭ, kali ja vyjaŭlała, što mužčynu za tuju samuju pracu zapłacili bolš, čym mnie», — pryznajecca Merja Machka, raniej žurnalistka, a ciapier inviestarka i błohierka, jakaja ŭžo treci hod razvarušvaje hramadskuju dyskusiju pra prazrystaść zarobkaŭ. Sioleta jana paznačaje ŭ sacyjalnych sietkach, što ŭ 2020 hodzie atrymała 56 tysiač dalaraŭ dachodu.
Kali hety zakonaprajekt raspracoŭvaŭsia ŭ minułym listapadzie, hałoŭnaja finskaja arhanizacyja pracadaŭcaŭ, Kanfiederacyja finskaj pramysłovaści, vyjšła z pracoŭnaj hrupy na znak pratestu.
Varta hłybiej daśledavać prablemu roźnicy ŭ apłacie pracy, a vyviešvać infarmacyju pra zarobak možna tolki sa zhody čałavieka, pierakananyja pracadaŭcy. Infarmacyja pra zarobak kožnaha tolki pahoršyć atmaśfieru ŭ pracoŭnym kalektyvie, ličać jany.
Pradstaŭniki prafsajuzaŭ, naadvarot, ličać, što tema niaroŭnaści ŭžo dobra daśledavanaja, i pryjšoŭ čas dziejničać.
«Kab vyraŭniać zarobki, treba pamianiać staŭleńnie ludziej da hetaj prablemy, a kab źmianiłasia niešta ŭ ahulnaj kultury — treba spačatku źmianić zakon», — dadaje Kataryna Muro, dyrektarka Kanfiederacyi prafsajuznych rabotnikaŭ i mieniedžaraŭ.
Skłaści taki zakonaprajekt — niaprostaja sprava. Ale členy pracoŭnaj hrupy spadziajucca, što jon budzie pryniaty jašče da nastupnych parłamienckich vybaraŭ u 2023 hodzie.
U Parahvai restaŭratara i jaho dačku zabili z-za skrypak Stradyvary
Va Ukrainie źniščyli paŭmiljona doz zachodniaj vakcyny — ludzi nie chočuć pryščaplacca
