U Viciebsku raźvitalisia z fatohrafam Juryjem Šepielevym. Jamu było 49 hadoŭ
Jon pamior 8 listapada paśla ciažkaj chvaroby na 50-m hodzie žyćcia.
Juryja Šepieleva viedajuć najpierš jak fatohrafa, jaki šmat hadoŭ zdymaŭ haradskija krajavidy. Jon štodnia vychodziŭ na špacyr pa vulicach rodnaha horada z fotaaparatam i amal štoviečar vykładaŭ u sacyjalnyja sietki novyja fotazdymki, piša BAŽ.
Viciebskija krajavidy, źniatyja Juryjem Šepielevym, demanstravalisia na haradskich fotavystavach, a ŭ 2020-m hodzie prychilniki jahonaha talentu ŭbačyli pieršuju, i, na žal, užo apošniuju piersanalnuju fotavystavu.
U apošnija hady Juryj Šepieleŭ supracoŭničaŭ z sajtam «Narodnyja naviny Viciebska», apublikavaŭ na hetym resursie bolš za 400 fotarepartažaŭ i fotazamalovak.
Dziakujučy tvoram Juryja Šepieleva viciebskija krajavidy ŭbačyli žychary roznych krain: aŭtar admysłova stvaryŭ niekalki supołak u sacyjalnych sietkach, dzie publikavaŭ svaje fotazdymki. Na žal, novych tvoraŭ tam bolš nie źjavicca, ale zroblenaje Juryjem Šepielevym zasłuhoŭvaje samaj hłybokaj pavahi i samaj śvietłaj pamiaci.
