Kožnaja piataja vakansija — z zarobkam da 500 rubloŭ. Kaho šukajuć na pracu i kolki hatovy płacić?
Z pačatku hoda kankurencyja na rynku pracy źniziłasia. Jakich śpiecyjalistaŭ ciapier šukajuć? I kolki hatovy płacić? Pahladzieli, što adbyvajecca z vakansijami.
Kankurencyja — šeść reziume na vakansiju. Ale nie dla studentaŭ i jurystaŭ
Jakich vakansij ciapier najbolš? Čverć usich prapanoŭ — u halinie prodažaŭ. Kala 16% vakansij — dla IT, 13% — dla rabočaha piersanału, 10% — u transparcie i łahistycy, 9% — na vytvorčaści. Takija ličby pryvodzić daśledčy centr rabota.by. Usiaho na sajcie ciapier 30,5 tysiačy vakansij.
Siarod suiskalnikaŭ šmat studentaŭ ci śpiecyjalistaŭ biez vopytu (22,5% ad usich). Chapaje reziume ad «pradažnikaŭ» (14%), rabotnikaŭ transpartu i łahistyki (amal 7%), ajcišnikaŭ (kala 7%), buchhałtaraŭ i administracyjnaha piersanału (pa 6%).
Z pačatku hoda kankurencyja źniziłasia. Kali ŭ studzieni na adnu vakansiju prypadała dzieviać reziume, to ŭ vieraśni — šeść. Najbolšaja kankurencyja siarod maładych śpiecyjalistaŭ: na adno miesca pretenduje amal 19 čałaviek.
Składana znajści pracu jurystam: u hetaj śfiery amal 13 reziume na vakansiju. Letaś było jašče horš, kali situacyju ŭskładniła epidemija. Juryskonsultam najmalniki hatovy płacić ad 625 da 1500 rubloŭ.
A voś u IT kankurencyja padaje. U trecim kvartale na adno miesca było 2,5 reziume. Samyja zapatrabavanyja ŭ hetaj śfiery — QA inžyniery, frontend raspracoŭščyki, raspracoŭščyki na PHP i Java, prodžekt-mieniedžary.
Što da zarobkaŭ, to śpiecyjalistam siaredniaha ŭzroŭniu prapanujuć u asnoŭnym ad 1100 da 2250 dalaraŭ, vyšejšaha — ad 1500 da 3500.
Vakansij z zarobkam bolšym za 1600 rubloŭ — tolki 1,6%.
Dziaržaŭnaja słužba zaniataści kaža pra 99 tysiač vakansij u krainie. Amal 65% ź ich — pa rabočych prafiesijach.
Kaho šukajuć najpierš? U Minsku heta prybiralščyk, miedsiastra, doktar, śpiecyjalist pa arhanizacyi zakupak i kuchar.
«Kavidnyja nadbaŭki płaciać, ale ludzi ŭsio roŭna sychodziać». Niekatoryja biełaruskija balnicy i palikliniki šukajuć pa 100 i bolš śpiecyjalistaŭ
Va ŭsich abłaściach patrebny miedyki, kiroŭcy i traktarysty-mašynisty. U Minskaj vobłaści šmat vakansij taksama dla padsobnych rabočych i hruzčykaŭ, u Hrodzienskaj — dla prybiralščykaŭ. Na Brestčynie i Homielščynie nieabchodny švački, na Mahiloŭščynie i Viciebščynie — pradaŭcy.
Prablemnymi rajonami ličacca Brasłaŭ, Pastavy, Šumilina, Sianno i Hancavičy. Ich žycharam składaniej za ŭsio znajści pracu.
Kali hladzieć na hrošy, jakija prapanujuć, to kožnaja piataja vakansija ŭ krainie — z zarobkam da 500 rubloŭ. Ad 1000 da 1500 rubloŭ — 18% prapanoŭ. Vakansij, dzie abiacajuć płacić bolš za 1600 rubloŭ, — tolki 1,6%.
Łavina popytu na ajcišnikaŭ i śpiecyjalistaŭ pa prodažy abstalavańnia
«Ciapier rynak na padjomie. Heta dobry šanc dla kandydataŭ znajści vysokaapłatnuju pracu», — kaža dyrektarka kadravaha ahienctva «Kvadrat» Śviatłana Karaścialova.Kadravaje ahienctva achoplivaje nie ŭsie prafiesii, padbiraje administracyjny piersanał i kiraŭnikoŭ, tamu maje karcinu tolki pa hetych śpiecyjalnaściach u IT, handli, transparcie, śfiery pasłuh.
Karaścialova bačyć u padjomie rynku pracy niekalki pryčyn — ažyŭleńnie našaj ekanomiki, vychad z pandemijnaha kryzisu ŭ śviecie, siezonnaść (uvosień zvyčajna bolš aktyŭna nabirajuć rabotnikaŭ). Adbivajecca i toje, što mnohija śpiecyjalisty źjechali za miažu, i na ich miescy šukajuć zamienu. Ajcišnikaŭ kampanii raźbirajuć vielmi chutka.
«Na ich zaŭsiody šalony popyt. I prahnoz taki, što jon budzie raści da biaskoncaści.
Kažuć, što 17% śpiecyjalistaŭ źjechali, jašče častka pracuje na zamiežnych pracadaŭcaŭ. Nie tak šmat zastajecca tych, chto hatovy pracavać na biełaruskija kampanii. Tamu na ich łavina popytu, pryčym z pavyšeńniem pa zarobku na 30-50%.
Pieramanić dobrych śpiecyjalistaŭ praktyčna niemahčyma: u kožnaha byvaje pa 5-7 džobofieraŭ (prapanoŭ ab pracy) ad roznych kampanij, — raskazvaje pra tendencyi Śviatłana Karaścialova. — Taksama masavy popyt na śpiecyjalistaŭ u halinie prodažaŭ.
Čaściej patrebny tyja, chto vałodaje anhlijskaj movaj i maje techničnuju adukacyju, bo razmova idzie, naprykład, pra prodaž abstalavańnia, pradukcyi mašynabudavańnia. Ale źmianšajecca popyt na śpiecyjalistaŭ, jakija pradajuć cukierki, pampiersy, adzieńnie — imi pieranasyčany rynak.
Nieabchodny śpiecyjalisty pa padbory piersanału. Heta jak lusterka stanu rynku pracy. U asnoŭnym šukajuć IT-rekrucioraŭ. Choć u realnym siektary ekanomiki takija śpiecyjalisty ciapier taksama zapatrabavanyja.
Pavyšajecca popyt na śpiecyjalistaŭ u śfiery dydžytał-markietynhu. Heta danina času, modny kirunak, bo ŭsie pierachodziać u režym anłajn. Ciapier šmat tych, chto prajšoŭ takija kursy, ale talenavitych vielmi mała, 5-7%, napeŭna. Tam nastupnaja tendencyja: kali čałaviek paśpiachovy paśla kursaŭ, jon sychodzić u fryłans ci adkryvaje svajo ahienctva».
Kampanii šukajuć taksama kiraŭnikoŭ — kamiercyjnych dyrektaraŭ, dyrektaraŭ pa markietynhu, pa piersanale.
«Vializnaja kolkaść pracadaŭcaŭ chacieła b, kab zarobak byŭ 200-300 rubloŭ plus pracenty»
Jakich rabotnikaŭ na biržy zašmat? Heta pierakładčyki, psichołahi, ekanamisty-mieniedžary, buchhałtary. Śpiecyjalisty nie zarablajučych padraździaleńniaŭ ciapier nie nadta zapatrabavanyja, bo zarobki, jakija im daviadziecca płacić, realnyja, a hrošaj jany nie prynosiać.
Budaŭničaja halina — u katastrafičnaj situacyi, ličyć Śviatłana Karaścialova.
«Šmat śpiecyjalistaŭ vyzvalajecca, u tym liku top uzroŭniu. Ja niadaŭna šukała ludziej na pasady hałoŭnaha inžyniera, dyrektara budaŭničaj kampanii. Ździŭlaje, što zarobki dla hetaha ŭzroŭniu ludzi nazyvajuć kapieječnyja — ad 2500 rubloŭ. Samy darahi śpiecyjalist zachacieŭ piać tysiač rubloŭ — dla pasady dyrektara heta vielmi nizkaja płanka ŭ paraŭnańni z tym, što było niekatory čas tamu, kali byŭ bum na takich śpiecyjalistaŭ, Tady nazyvali zarobki nie nižejšyja za piać tysiač dalaraŭ».
Zapatrabavanaść prafiesii nie zaŭsiody aznačaje vysoki zarobak. Kali za ajcišnikaŭ hatovy vykładać vialikija hrošy, to, naprykład, mieniedžaraŭ sprabujuć naniać za kapiejki.
«Što tyčycca mieniedžaraŭ pa prodažach, my biarom u pracu vakansii, dzie zarobak prapanujecca nie nižejšy za 1000 rubloŭ fiksavanaja častka plus premija, bonusy.
Vializnaja kolkaść pracadaŭcaŭ chacieła b, kab zarobak byŭ 200-300 rubloŭ plus pracenty.
My vymušany kazać im, što takich śpiecyjalistaŭ znajści niemahčyma. Heta budzie niedaśpiecyjalist. Plus jość niejki minimalny pražytačny minimum. Mnie składana ŭjavić chłopca, u jakoha jość siamja, dvoje dziaciej, i jon budzie pracavać na takich umovach. Ja liču, što 1500-2000 rubloŭ — narmalny ŭzrovień zarobku dla mieniedžara pa prodažach biez usiakich navarotaŭ typu viedańnia zamiežnaj movy.
U IT u zaležnaści ad pazicyi zarobak u razy adroźnivajecca.
Kali my kažam pra džunijaraŭ (małodšych śpiecyjalistaŭ), tam jon moža pačynacca z 500 dalaraŭ. I na hetyja hrošy prahramisty biez vopytu pracy achvotna pahadžajucca, kab začapicca i trapić u halinu, bo paśla chutka pačniecca rost pa zarobku.
Na pasadzie sieńjora (staršaha śpiecyjalista) zarobak pačynajecca ad 3000-3500 dalaraŭ».
***
Kali vy šukajecie pracu ci šukali jaje ź ciažkaściami, napišycie, kali łaska ŭ naš telehram-bot — @nasa_niva_bot.
