U Nikarahua zaviaršylisia vybary prezidenta. Usie asnoŭnyja supierniki Artehi ŭ turmie
U Nikarahua zaviaršyłasia hałasavańnie na prezidenckich vybarach. Ličycca, što vynikam stanie pieraabrańnie Daniela Artehi na prezidenckuju pasadu. Prezident ZŠA Džo Bajden nazvaŭ vybary «padstaŭnymi». Ciaham pieradvybarčaj kampanii ŭ Nikarahua pasadzili niekalki apanientaŭ režymu, a inšych Arteha vycisnuŭ na emihracyju i kpiŭ ź ich, piša «Hołas. Amieryki».
AP
Vybary, jak adznačaje vydańnie, prachodzili pry achovie 30 tysiač vajskoŭcaŭ i palicyjantaŭ. Siamiora apazicyjnych kandydataŭ, jakija kinuli vyklik 75-hadovamu Artehu, pierabyvajuć u turmie ad červienia pa palityčna matyvavanych abvinavačańniach.
Dla Artehi novy termin stanie ŭžo piatym, a jahonaja žonka, 70-hadovaja Razaryja Muryljo znoŭ budzie vice-prezidentam krainy. Aficyjnyja ličby nazavuć praź niekalki dzion.
Supiernikami dyktatara na vybarach byli piaciora čałaviek, adnak u apazicyi ŭsich ich nazyvajuć pamahatymi režymu. Apanienty Artehi kažuć ab tym, što na vybarach była nizkaja jaŭka — mnohija z demakratyčna nastrojenych žycharoŭ Nikarahua nie pajšli hałasavać, viedajučy pra falsifikacyi.
Daniel Arteha padčas hałasavańnia znoŭ nakinuŭsia z krytykaj na svaich praciŭnikaŭ, zajaviŭšy, što vystupaje suprać tych, chto «prapahanduje teraryzm, finansuje vajnu, sieje teror i śmierć».
Jon mieŭ na ŭvazie nikarahuancaŭ, jakija ŭdzielničali ŭ masavych akcyjach pratestu suprać dyktatury ŭ 2018 hodzie, ale ich sustreli hvałtoŭnym razhonam, jaki zabraŭ bolš za 300 žyćciaŭ u samaj biednaj krainie Centralnaj Amieryki. Z taho času kala 150 čałaviek apynulisia za kratami, u tym liku 39 dziejačaŭ apazicyi. Jašče kala 100 000 nikarahuancaŭ akazalisia ŭ vyhnańni.
Daniel Arteha pryjšoŭ pieršy raz da ŭłady ŭ 1979 hodzie i kiravaŭ krainaj da 1990-ha, potym byŭ abrany ŭ 2007 hodzie i z taho času niaźmienna kiruje Nikarahua.
