Kiraŭnik biełaruskaha Čyrvonaha Kryža — antyvaksieram: Jak budziecie siabie pavodzić, kali vaša mama ci tata nie pryščepiacca i ŭsio skončycca žałasna?
Hienieralny sakratar Biełaruskaha tavarystva Čyrvonaha Kryža Dźmitryj Šaŭcoŭ vykazaŭ ździŭleńnie z-za infarmacyi ŭ internecie ab «čypiravańni» ludziej z dapamohaj vakcyny ad karanavirusa i zaklikaŭ nie vieścisia na padobnyja chitryki.
— Što tyčycca antyvaksieraŭ, jakija dla siabie vyrašyli nie pryščaplacca ni pad jakoj umovaj, to ja chaču spytać, ci hatovyja jany ŭskładać na siabie adkaznaść za svaich svajakoŭ. Jak vy budziecie siabie pavodzić, kali vašy mama ci tata, hledziačy na vas, nie pryščepiacca, i ŭsio skončycca žałasna? Jak budziecie siabie adčuvać? — skazaŭ Šaŭcoŭ. — Varta razumieć, što jość placoŭki, jakija zaklikajuć da taho, kab ludzi nie vakcynavalisia. Kamuści heta vyhadna. Kali razvažać z ekanamičnaha punktu hledžańnia, to, pakul dziaržava zmahajecca z toj ci inšaj chvalaj karanavirusnaj infiekcyi, jość vialikaja kolkaść chvorych, jakija niekatory čas buduć niepracazdolnyja. Tamu jany nie vyrabiać nieabchodnaj kolkaści pradukcyi, nie akažuć stanoŭčy efiekt na VUP i hetak dalej. Kali nie budzie hetaj prablemy, to ekanomika budzie raźvivacca tak, jak i raźvivałasia.
Taksama Šaŭcoŭ spyniŭsia na situacyi ŭ dziaržavach, dzie bolšaja častka nasielnictva vakcynavanaja. Śpiecyjalist padzialiŭsia infarmacyjaj, atrymanaj ad jaho dackaha kalehi, jaki raspavioŭ, što ŭ Danii 86 % pryščeplenych, prablem z karanavirusnaj infiekcyjaj niama.
— Nie va ŭsich krainach Jeŭropy ŭsio tak radasna. My bačym heta pa pratesnych nastrojach u Prybałtycy, Hiermanii, ZŠA, dzie ludzi vychodziać dziasiatkami tysiač, — adznačyŭ surazmoŭca. — Danija — sama pa sabie maleńkaja kraina, bolš kiravanaja, čym 50-miljonnyja krainy. Tam zmahli danieści, što nieabchodna pryščaplacca. Moj kaleha raspavioŭ, što datčanie praciahvajuć chvareć na kavid, ale ŭ stacyjanary z karanavirusnaj pnieŭmanijaj pastupajuć adzinki, jak praviła, ź liku niepryščeplenych.
