«Heta plavok mnie ŭ tvar!» Byłyja siłaviki zajaŭlajuć, što Śledčy kamitet dapamahaje milicyi padmianiać dokazy
Byłyja siłaviki, jakija ŭ 2020-m na znak pratestu pakinuli słužbu, apublikavali novaje rasśledavańnie. Jany zajaŭlajuć, što śledčyja dapamahajuć apieratyŭnikam padtasoŭvać dokazy pa kryminalnych spravach.
Fota: pac.by
Tak, apublikavana aŭdyja razmovy, jak śćviardžajecca, namieśnika načalnika SK pa Kastryčnickim rajonie ŭ Minsku Mirasłavy Chłyščanki-Chazanoŭskaj z kiraŭnikom narkakantrolu taho ž rajona Vitalom Sidarovičam.
Z hutarki vynikaje, što apieratyŭniki nakasiačyli z afarmleńniem dokazaŭ, ale zamiest taho, kab zaviarnuć takija materyjały i admović u zaviadzieńni spravy, jak taho patrabuje zakon, śledčaja raić, jak ich vypravić, kab jany vyhladali zakonnymi.
«Ja prosta nikoli ŭ žyćci nie dumała, što ad svajho Kastryčnickaha NONa atrymaju takuju *** (niecenzurnaje ŭ značeńni «chałturu»). Uvohule poŭny nul, Vitalik. Nieprafiesijanalizm poŭny, poŭny prosta! — kaža hołas, jak śćviardžajecca, Chłyščanka-Chazanoŭskaj. — Ja ŭčora kali ŭbačyła ahlady, pryčym dzie jany izastužki vymajuć (havorka pra izastužku, jakoj abhortvajuć pakiety z zabaronienymi rečyvami — zaŭv. «NN»)…
Pačynajuć ahlad telefona, jaki vymajecca 13-ha čysła, a ahladajuć jaho niejkim čynam 12-ha čysła. I ŭsie hetyja ahlady — roznyja počyrki, roznyja asadki. Heta što za *** (niecenzurnaje ŭ značeńni «chałtura»)? Ja tabie kažu, ja *** (niecenzurnaje ŭ značeńni «była vielmi ździŭlena») ad hetaha materyjału.
I mnie zaraz pryvoziać pieraroblenyja ahlady. A viedaješ, jak jon (apieratyŭnik — zaŭv. NN) razdrukavaŭ ahlad mabilnaha telefona? Voś heta jašče raz plavok, paŭtorny plavok mnie ŭ tvar. U jaho navat šapka «Pratakoł» abrezanaja. Nu što heta za śvinstva takoje? *** (niecenzurnaje ŭ značeńni «ničoha») nie zroblena ŭvohule pa materyjale!»
Cikava, što zvanok idzie z kabinieta, dzie ŭ toj čas siadzić, jak kaža hołas na zapisie, «bandytka» — vierahodna, fihurantka hetaj samaj kryminalnaj spravy.
Dalej havorka idzie pra nieprafiesijanalizm supracoŭnikaŭ milicyi. Hołas, padobny da pradstaŭnicy Śledčaha kamiteta, raskazvaje, što praź ich nieprafiesijanalizm pa adnoj sa spraŭ joj davodziłasia stelefanoŭvacca z ekśpiertam, pieraroblivać materyjały, jakija kładucca ŭ asnovu kryminalnaj spravy.
U hetym łancužku nie abyšłosia i biez prakurora, zadača jakoha acanić sabranyja dokazy i, kali jany niezakonnyja, zaviarnuć spravu, nie dapuścić, kab jana pajšła ŭ sud. Byłyja siłaviki apublikavali zapis razmovy, jak śćviardžajecca, z namieśnikam prakurora Kastryčnickaha rajona Jaŭhienam Maciušenkam. Voś samaja krasamoŭnaja cytata:
«Nu, vy tady nie raspaŭsiudžvajciesia, što ja dam vam niešta vypravić», — prosić jon śledčuju.
U razmovie z padnačalenaj hołas, padobny da Chłyščanka-Chazanoŭskaj, tłumačyć, čamu atrymałasia damovicca z prakuroram: jaje muž Maksim Chłyščanka pracuje ŭ prakuratury Minska. Dadadzim, što jaje śviokar Aleh Chłyščanka pracuje ŭ Hienieralnaj prakuratury.
Falsifikacyja dokazaŭ — złačynstva (art. 395 KK), dokazy, zdabytyja niezakonnym šlacham, nie mohuć być pakładzienyja ŭ asnovu kryminalnaj spravy, sprava pry takich abstavinach uvohule nie pavinna zavodzicca.
Pa jakoj častcy «narkatyčnaha» artykuła ŭ vyniku zaviali spravu, nie paviedamlajecca, ale adznačym, što maksimalnaje pakarańnie pa art. 328 KK — da 20 hadoŭ pazbaŭleńnia svabody.
A voś jakaja schiema dziejańniaŭ pa palityčnych spravach. Byłyja siłaviki publikujuć zapis, jak śćviardžajecca, razmovy Chłyščanka-Chazanoŭskaj z načalnikam milicyi hramadskaj biaśpieki taho ž rajona Siarhiejem Drazdovym. Razmova idzie pra toje, što na płocie niechta napisaŭ «Łukašenku — u aŭtazak». Ekśpierty pryjšli da vysnovy, što abrazy ŭ nadpisie niama. Uronu niama, bo płot idzie pad znos. U hetaj situacyi hołas, padobny da Chłyščanka-Chazanoŭskaj, zajaŭlaje, što, kali materyjały nakirujuć u SK, jana zaviadzie spravu pa chulihanstvie:
«Mnie dla chulihanstva ničoha nie treba, — kaža hołas, jak śćviardžajecca, śledčaj. — Voś hetaha nadpisu na płocie dastatkova».
