Sud u Amsterdamie abaviazaŭ krymskija muziei viarnuć Ukrainie zołata skifaŭ
Apielacyjny sud Amsterdama pastanaviŭ viarnuć Ukrainie kalekcyju zołata skifaŭ z muziejaŭ anieksavanaha Kryma, jakoje ciapier znachodzicca ŭ Niderłandach.
Takim čynam, sud paćvierdziŭ papiaredniaje rašeńnie Akruhovaha administracyjnaha suda stalicy Niderłandaŭ ad 14 śniežnia 2016 hoda, piša Bi-bi-si.
Vystava «Krym. Załaty vostraŭ u Čornym mory» prachodziła ŭ muziei Ałarda Pirsana ŭ Amsterdamie z 7 lutaha pa 31 žniŭnia 2014 hoda i składałasia z ekspanataŭ čatyroch krymskich muziejaŭ i adnaho kijeŭskaha.
Paśla anieksii paŭvostrava Rasijaj paŭstała sprečka nakont taho, ci viartać ekspanaty ŭ Krym albo ž na padkantrolnyja ŭkrainskim uładam terytoryi. Ukraina vyjhrała praces u pieršaj instancyi. Tady Niderłandski sud pastanaviŭ, što Kijevu pavinny viarnuć kaštoŭnaści na padstavie Kanviencyi JUNIESKA ad 1970 hoda, jakaja padkreślivaje, što kulturnaja spadčyna naležyć suvierennaj dziaržavie.
U 2017 hodzie krymskija muziei padali apielacyju na hetaje rašeńnie.
Padčas papiaredniaha pracesu sud kiravaŭsia tym, što Krym nie źjaŭlajecca suvierennaj dziaržavaj i nie moža zajaŭlać ab svaim pravie na abjekty mastactva. Takim čynam, rašeńnie ab tym, kamu pavinny być viernutyja artefakty, pavinien pryniać ukrainski sud paśla taho, jak jany apynucca na terytoryi Ukrainy. U 2019 hodzie, pierad pačatkam słuchańniaŭ u amsterdamskim sudzie, Ministerstva justycyi Ukrainy zajaviła, što zarehistravanyja pavodle rasijskaha zakanadaŭstva krymskija muziei nie majuć dačynieńnia da tych damoŭlenaściaŭ, na asnovie jakich kaštoŭnaści vystaŭlalisia ŭ Niderłandach.
«Heta, u našym razumieńni, nienaležny pazoŭščyk, na što my adrazu źviarnuli ŭvahu suda. Asablivaja cyničnaść pazicyi pradstaŭnikoŭ tak zvanych krymskich muziejaŭ zaklučajecca ŭ tym, što jany ŭ svaich dovadach abapirajucca na ŭkrainskaje zakanadaŭstva i ličać, što mienavita pa ŭkrainskim zakanadaŭstvie jany majuć prava na zachoŭvańnie hetych abjektaŭ», — tłumačyŭ tahačasny namieśnik ministra Siarhiej Pietuchoŭ.
Muziei Kryma, u svaju čarhu, raspaŭsiudzili zajavu, u jakoj adznačałasia, što ŭ sudovym pracesie pavinna adsutničać palityčnaja padaploka.
«My ličym, što ekspanaty, jakija źjaŭlajucca nieadjemnaj častkaj našych kalekcyj, pavinny viarnucca da svajho pieršapačatkovaha miesca znachodžańnia — Krymskaha paŭvostrava. Ich status i pravy abaronieny zakonam», — kazałasia ŭ sumiesnaj zajavie muziejaŭ.
