Praŭładnyja kanały: žurnalista Dzianisa Ivašyna abvinavačvajuć u zdradzie dziaržavie. Rodnyja: aficyjnaha paćvierdžańnia niama
41-hadovy Ivašyn byŭ zatrymany ŭ Hrodnie 12 sakavika 2021 hoda, pa pieršapačatkovaj infarmacyi za «ŭmiašańnie ŭ dziejnaść milicyi», heta artykuł 365 KK, pakarańnie — da troch hadoŭ kałonii. Pryčynaj staŭ materyjał Ivašyna pra byłych supracoŭnikaŭ ukrainskaha «Bierkuta», jakija ciapier słužać u biełaruskich siłavych strukturach. Pravaabaroncy pryznali Dzianisa Ivašyna palitviaźniem. Ale 25 kastryčnika «ananimnyja» praŭładnyja telehram-kanały paviedamili, što Ivašynu pierakvalifikavali abvinavačvańnie. Ciapier jon prachodzić pa artykule 356 KK — «zdrada dziaržavie». Pakarańnie vielmi surjoznaje — ad 7 da 15 hadoŭ źniavoleńnia.
«Naša Niva» źviarnułasia da maci Dzianisa Ivašyna. Žančyna kaža, što čutki pra pierakvalifikavańnie spravy dachodzili i da jaje, ale aficyjnych paćvierdžańniaŭ hetamu ŭ siamji niama.
«My pisali zvaroty, kab nam paviedamili, u čym kankretna i pa jakich artykułach vinavaciać Dzianisa, ale biezvynikova. Advakaty taksama nie mohuć ničoha skazać, bo jany pad padpiskaj», — kaža maci žurnalista.
Raniej Ivašyn skardziŭsia, što da jaho nie dachodziać mnohija listy, taksama jaho karali štrafnym izalataram. U červieni ŭ žurnalista zdaryŭsia sardečny prystup padčas znachodžańnia ŭ izalatary, paviedamlała jaho maci. A 26 kastryčnika stała viadoma, što žurnalist znoŭ znachodzicca ŭ ŠIZA: adbyŭ tam 6 sutak i praviadzie ŭ karcary jašče tydzień.
Taksama ŭ zdradzie dziaržavie abvinavačvajuć žurnalista Andreja Alaksandrava, jaki apłačvaŭ štrafy pratestoŭcaŭ hrašyma fondaŭ. A ŭ mai 2021 hoda pa hetym ža artykule (ale pa častcy 2) byŭ asudžany vajskoviec Dzianis Urad, jaki pieradaŭ słužbovy dakumient u telehram-kanał Ściapana Puciły. Urad atrymaŭ 18 hadoŭ.
