Praz čatyry miesiacy — refierendum pa Kanstytucyi. Kolki hrošaj jon kaštuje?
U pačatku 2022 hoda nas čakaje refierendum: buduć prymacca papraŭki ŭ Kanstytucyju, inicyjavanyja Alaksandram Łukašenkam. Hałasavańnie adbudziecca ŭ lutym. Ale ž u jakuju sumu padatkapłacielščykam abydziecca praviadzieńnie hetaha mierapryjemstva? I jak padličyć? Z hetymi pytańniami «Naša Niva» źviarnułasia da Uładzimira Kavałkina, kiraŭnika prajekta «Košt urada».
«Adzinaje, što my možam zrabić, heta paraŭnać, jakija vydatki byli na minułyja vybarčyja kampanii, — tłumačyć Uładzimir Kavałkin. —
Kali pahladzieć košt prezidenckich vybaraŭ 2020 hoda, to zaćvierdžany biudžet składaŭ 36 miljonaŭ 830 tysiač rubloŭ. A pa fakcie było vydatkavana 25 miljonaŭ 374 tysiačy.
Dakładna skazać, čamu takaja raźbiežka i na što mienavita traciacca hrošy, niemahčyma, detalizacyi hetych vydatkaŭ niama.
U 2019 hodzie na parłamienckija vybary, što cikava, było zakładziena ŭ biudžet tolki 538 tysiač rubloŭ. A patracili 22 miljony rubloŭ.
U 2018 hodzie pravodzilisia vybary ŭ miascovyja saviety. Jany kaštavali 19 miljonaŭ 243 tysiačy.
Adpaviedna, na kožnyja vybary za apošnija hady vyłučajecca suma ad 20 da 25 miljonaŭ rubloŭ. Miascovyja abychodziacca trochi tańniej, parłamienckija trochi daražejšyja, i samyja darahija — prezidenckija vybary.
Refierendum — mierapryjemstva ahulnanacyjanalnaha značeńnia, tamu tut ja b aryjentavaŭsia na vydatki paraŭnalnyja z prezidenckimi. Heta budzie pryblizna 22-25 miljonaŭ rubloŭ z karekciroŭkaj na inflacyju».
Darečy, u 2022 hodzie budzie ŭžo čaćviorty refierendum u historyi niezaležnaj Biełarusi. U 1995 hodzie pa vynikach refierendumu bieła-čyrvona-bieły ściah i «Pahoniu» zamianili «starymi novymi» skapijavanymi z savieckich simvałami, nadali ruskaj movie status dziaržaŭnaj, taksama Łukašenka atrymaŭ prava na daterminovy rospusk parłamienta.
U 1996 hodzie siarod inšych pytańniaŭ pryniali novuju redakcyju Kanstytucyi, jakuju prapanavaŭ Łukašenka. U vyniku paŭnamoctvy prezidenta značna pašyrylisia, a miascovych kiraŭnikoŭ stali nie vybirać, a pryznačać. U 2004 hodzie refierendum daŭ prava Łukašenku ŭdzielničać u prezidenckich vybarach nieabmiežavanuju kolkaść razoŭ.
Varta adznačyć, što aficyjnyja vyniki kožnaha z refierendumaŭ całkam zadavalniali patrabavańni biełaruskich uładaŭ.
