«Maja likvidacyja nie budzie katastrofaj». Savieljeŭ, što abnarodavaŭ pra katavańni ŭ rasijskich turmach, prakamientavaŭ abviaščeńnie ŭ vyšuk
Biełaruski ajcišnik Siarhiej Savieljeŭ, dziakujučy jakomu byli apublikavanyja zapisy z katavańniami ŭ rasijskich turmach, prakamientavaŭ abviaščeńnie jaho ŭ vyšuk na terytoryi Rasii, pra što stała viadoma napiaredadni, piša Radyjo Svaboda.
Savieljeŭ skazaŭ, što kryminalny artykuł, pavodle jakoha jaho šukajuć, nie nazyvajecca, ale jon miarkuje, što sprava tyčycca vydavańnia dziaržaŭnaj tajamnicy.
«Rasijskija ŭłady pajšli pa adzinym znajomym, adzinym pravilnym, ź ich punktu hledžańnia, šlachu. Pa šlachu siły, pa šlachu zapałochvańnia i znoŭ sprabujuć zatknuć mnie rot», — kaža Siarhiej Savieljeŭ.
Jon vykazaŭ škadavańnie, što zamiest pracy nad reformaj kryminalna-vykanaŭčaj sistemy, rasśledavańnia i pakarańnia datyčnych da katavalnych kanviejeraŭ, vyvučeńnia dokazaŭ, rasijskija ŭłady sprabujuć schavać praŭdu i «zamiać» spravu.
Siarhiej ličyć, što zrabić heta nie ŭdasca i kaža, što navina pra abviaščeńnie ŭ vyšuk nie stała dla jaho niečakanaściu.
«My rychtavalisia da hetaha varyjantu raźvićcia padziej i ŭsio roŭna heta vielmi sumna», — kaža jon.
Siarhiej vykazaŭ radaść z nahody taho, što znachodzicca ciapier u Francyi i vykazaŭ padziaku za mahčymaść zastacca ŭ hetaj krainie.
«I ja ŭpeŭnieny, što ŭsio dalej u mianie składziecca dobra. Čaho nie mahu skazać pra kryminalna-vykanaŭčuju systemu, pra ŭsich hetych piarevaratniaŭ, pra śpiecsłužby, jakija sprabujuć schavać, zamaskiravać, pierabłytać i z noh na hałavu pieraviarnuć praŭdu», — kaža jon.