Minčuku dali 1,5 hoda «chatniaj chimii» za abrazu Čamadanavaj pad pastom pra sud za abrazu Čamadanavaj
18 kastryčnika sud Frunzienskaha rajona Minska vynies prysud 45-hadovamu inžynieru-prahramistu Viktaru Lebiedzievu: jaho pryznali vinavatym pavodle art. 369 KK «Abraza pradstaŭnika ŭłady» i asudzili na 1,5 hoda «chatniaj chimii». Taksama jon kampiensavaŭ maralnuju škodu ŭ pamiery 3000 rubloŭ.
Volha Čamadanava. Fota: mvd.gov.by
Jaho pryznali vinavatym u tym, što ŭ telehram-kanale, jaki zaraz pryznanym ekstremisckim, jon abraziŭ Volhu Čamadanavu — u toj momant jana źjaŭlałasia pres-sakratarkaj MUS.
Tak, 26 studzienia 2021 hoda jon pakinuŭ kamientar pad pastom z navinoj pra sud, na jakim čałavieka za abrazu Čamadanavaj asudzili da «chatniaj chimii» i abaviazali jaho vypłacić na karyść paciarpiełaj 5000 rubloŭ.
Prysud vyniesła sudździa Alena Bušava. Dziaržabvinavačańnie padtrymaŭ prakuror Dźmitryj Chavaŭka.
Śviedka z boku abvinavačańnia — supracoŭnik HUUS Łoban — raspavioŭ, što padčas manitorynhu sacsietak vyjaviŭ pad fotazdymkam Čamadanavaj bolš za 60 kamientaroŭ, bolšaść ź jakich utrymlivała nienarmatyŭnuju leksiku. U jaho atrymałasia identyfikavać šerah karystalnikaŭ, siarod jakich byŭ i Lebiedzieŭ. Jon adznačyŭ, što 29 studzienia 2021 hoda kamientar byŭ vydaleny, ale ŭ jaho zachavaŭsia jahony skrynšot.
Na sudzie taksama vystupiła paciarpiełaja Volha Čamadanava. Jana raspaviała, što ŭspryniała kamientar jak abrazu. Taksama praz kamientar jana adčuła stres i maralnyja pakuty, tamu što kamientary taksama čytajuć jaje blizkija — u pieršuju čarhu heta datyčycca baćkoŭ i dački. Jana adznačyła, što tyja 5000 jana pieradała ludziam ź invalidnaściu i što naohuł usie kampiensacyi pieraličvajucca na dobruju spravu.
Hetym razam Čamadanava taksama zajaviła pazoŭ na sumu ŭ 3000 rubloŭ i pahadziłasia na toje, kab jany byli vydadzienyja najaŭnymi pad raśpisku. Pazoŭ byŭ zadavoleny ŭ poŭnym abjomie.
