Kitajec stvaryŭ chatniuju łabaratoryju, kab rabić leki dla śmiarotna chvoraha syna — preparatu niama praz pandemiju
30-hadovy kitajec Siuj Vej pačaŭ samastojna vyvučać farmakałohiju i zrabiŭ doma łabaratoryju, kab sintezavać leki dla svajho dvuchhadovaha syna Chaajana z zachvorvańniem, pry jakim zvyčajna nie žyvuć daŭžej za dziesiać hadoŭ. Pra heta piša South China Morning Post.
Synu Siuj Veja dyjahnastavali chvarobu Mienkiesa — redkaje hienietyčnaje zachvorvańnie, pry jakim u arhaniźmie parušajecca abmien miedzi, z-za čaho źjaŭlajucca patałohii niervovaj sistemy. Chłopčyku kožny dzień treba prymać miedny histydzin, ale dastać preparat praktyčna niemahčyma: leki nie dastaŭlajuć z ZŠA ŭ Kitaj praz karanavirusnyja abmiežavańni. Kitajskija kampanii jaho nie vyrablajuć z-za darahoŭli i biurakratyi.
Syn Siuj Veja Chaajan. Fota Weibo
Vej vyrašyŭ sintezavać miedny histydzin u chatnich umovach. Za try tysiačy dalaraŭ jon kupiŭ łabaratornaje abstalavańnie i zapisaŭsia na adkrytyja kursy pa farmakałohii i chimii ŭ miascovych VNU, kab navučycca rabić leki i praviarać ich jakaść. Mužčyna sintezuje preparat pa apisańniach z amierykanskich navukovych časopisaŭ.
Vej nie viedaje anhielskuju movu, tamu pierakładaje tekst praź pierakładčyki. «Časam atrymlivałasia biazhłuździca, i tekst davodziłasia pierakładać dasłoŭna. Heta składana, ale ŭ internecie zaŭsiody jość niejkija padkazki», — kaža jon.
«Ja nie vučyŭsia va ŭniviersitecie, ale heta nie značyć, što ja nie mahu vučycca. Ja patrebny majmu synu, i ja ŭsimi mahčymymi sposabami budu sprabavać vyratavać jaho. Ja liču, što možna pieraadoleć lubyja ciažkaści, i spadziajusia, što z časam Chaajanu stanie lepš. Ja prosta budu rabić usio, što mahu», — upeŭnieny baćka.
Fota z chatniaj łabaratoryi Siuj Veja, zdymak Weibo
Spačatku mužčyna praviaraŭ atrymany preparat na trusach. Paśla paśpiachovych testaŭ Vej zrabiŭ injekcyju sabie. Kali jon pierakanaŭsia, što ŭsio sterylna i biaśpiečna, uvioŭ preparat synu. Zatym Vej advioz jaho ŭ kliniku na abśledavańnie — miedyki vyklučyli mahčymaść niehatyŭnych pabočnych efiektaŭ.
Kitajskija orhany achovy zdaroŭja viedajuć ab chatniaj łabaratoryi mužčyny i nie pieraškadžajuć jaho pracy. «Jon robić leki tolki dla svajho syna i całkam biare adkaznaść na siabie. Pakul jon nie pradaje preparat inšym, nijakaj niebiaśpieki dla hramadzian niama. My nie staniem umiešvacca», — zajavili čynoŭnik.
Ciapier Vej rychtujecca da pastupleńnia va ŭniviersitet na śpiecyjalnaść «hiennaja inžynieryja». Jon choča ŭdaskanalić svaje navyki i sintezavać jašče adzin preparat, jaki dapamahaje pry chvaroby Mienkiesa.
