Jakija novyja padatki i štrafy prydumali biełaruskija ŭłady za hod
Padatak na kvateru, štraf za adsutnaść maski, padatak z zamiežnych pakupak — Svaboda pieraličvaje padatkovyja inicyjatyvy ŭładaŭ.
Padatak na kvateru
Ministerstva finansaŭ Biełarusi apublikavała prajekt źmienaŭ u Padatkovy kodeks.
Pavodle prajektu, padatak na nieruchomaść abaviažuć płacić navat za adzinuju kvateru va ŭłasnaści z 1 studzienia 2022 hodu.
Heta praduhledžana punktam 114 prajektu zakonu. Vyklučeńni prapanujuć tolki dla pensijaneraŭ, invalidaŭ I i II hrupy, niepaŭnaletnich, niedziejazdolnych, vajskoŭcaŭ, udzielnikaŭ Druhoj suśvietnaj vajny.
Paviedamlałasia, što ŭ Miensku hety padatak budzie ŭ siarednim 50 rubloŭ na hod, u rehijonach — kala 25 rubloŭ.
Padatak na dadatkovuju vartaść dla zamiežnych kampanij
Ciapier zamiežnyja kampanii, takija jak Aliexpress, Ozon, Wildberries, nia spłočvajuć PDV pry adpraŭcy tavaraŭ u Biełaruś. Zhodna ź infarmacyjaj ad Minfinu, hetaja norma moža źmianicca ź lipienia 2022 hodu.
Staŭka PDV — 20%. Niezrazumieła tolki, chto mienavita budzie apłočvać novy padatak: biełarusy, jakija zamovili tavar, ci kampanii, jakija jaho adpravili ŭ Biełaruś.
Padatak na vyjezd za miažu
U krasaviku ŭłady prydumali ŭvieści padatak dla tych, chto vyjaždžaje na miažu na svaim aŭtamabili praz naziemnyja punkty propusku. Kab vyjechać, treba zapłacić 1 bazavuju vieličyniu, ci 29 rubloŭ. Kali ŭvodzić padatak, vyrašali miascovyja ŭłady, tamu ŭ roznych abłaściach jaho pačali brać u rozny čas. Z červienia padatak uviali ŭ Horadzienskaj i Homielskaj vobłaści, ź lipienia — u Bieraściejskaj vobłaści.
Vyrastuć padatki dla IP
Ministerstva finansaŭ 28 vieraśnia apublikavała prajekt zakonu ab źmienach, u tym liku, u Padatkovy kodeks. Zhodna z hetym dakumentam, padatak dla IP moža vyraści da 16%, utraja, bo ciapier mnohija IP płaciać padatak pa sproščanaj schiemie — 5%.
Prajekt zakonu pakul nie pryniaty.
Štrafy i pazbaŭleńnie pravoŭ za klakson
Za hukavyja syhnały «biez patreby» DAI moža štrafavać kiroŭcaŭ z 1 sakavika. Takija normy źmiaščaje novy Administracyjny kodeks. Štraf moža składać da 10 bazavych, ci da 290 rubloŭ, z pazbaŭleńniem pravoŭ na termin da hodu.
Jakraz klaksonami kiroŭcy aŭtamabilaŭ padtrymlivali pratestoŭcaŭ u 2020 hodzie.
Štraf za abrazu słužbovaj asoby
U novym Administracyjnym kodeksie taksama ŭvodzicca niekalki novych štrafaŭ dla hramadzianaŭ. Štraf za abrazu słužbovaj asoby ŭ internecie — da 200 bazavych vieličyniaŭ, ci da 5800 rubloŭ.
Źjaviłasia adkaznaść za finansavańnie ŚMI zamiežnymi jurydyčnymi asobami, zamiežnymi hramadzianami ci asobami biez hramadzianstva ŭ vypadku, kali heta zabaroniena zakanadaŭčymi aktami, a taksama za finansavańnie z ananimnych krynic. Karać buduć štrafam da 50 bazavych vieličyniaŭ, ci da 1450 rubloŭ. Mohuć zabrać atrymanyja srodki i navat majomaść.
Źjaviŭsia asobny artykuł, kab možna było karać za ściahi — «niezakonnaje vykarystańnie i vyrab ściahoŭ i symbalaŭ». Za heta možna atrymać štraf ad 5 da 20 bazavych vieličyniaŭ, ci ad 145 da 580 rubloŭ.
Pavialičyli pamier štrafu za niepadparadkavańnie słužbovaj asobie: z 50 da 100 (2900 rubloŭ) bazavych vieličyniaŭ u maksymalnym značeńni.
Pavialičyŭsia i štraf pavodle artykułu «Parušeńnie paradku arhanizacyi albo praviadzieńnia masavych mierapryjemstvaŭ». U vypadku, kali hetaje «parušeńnie» zroblena paŭtorna ciaham hodu, štraf moža być 200 bazavych (5800 rubloŭ). Raniej maksymalnaje značeńnie było 100 bazavych.
Štraf za adsutnaść na tvary masak u hramadzkich miescach
U Ministerstvie justycyi adšukali normu zakonu, pavodle jakoj zmohuć karać biełarusaŭ štrafami za adsutnaść maski ŭ hramadzkich miescach:
- dla fizyčnych asobaŭ — štraf da 30 BV (ciapier 870 rubloŭ);
- dla IP — štraf da 200 BV (ciapier 5800 rubloŭ);
- dla jurydyčnych asobaŭ — štraf da 500 BV (ciapier 11 600 rubloŭ).
