«Atrymaŭsia poŭny abłom». Palitołah — pra hałoŭnyja vysnovy z samitaŭ u Minsku, jakija prajšli nie pa scenary Łukašenki
14 i 15 kastryčnika u Minsku prachodziła adrazu dva samity — Jeŭrazijskaha ekanamičnaha sajuza i SND. Jany prachodzili ŭ anłajn-farmacie. Sabrali samyja charakternyja cytaty adtul i paprasili palitołaha Valeryja Karbaleviča adznačyć hałoŭnaje z dvuch dzion pasiadžeńniaŭ.
Płan supraćstajańnia sankcyjam
Hałoŭnaj balučaj kropkaj na abodvuch mierapryjemstvach dla biełaruskaha boku stali sankcyi, pra heta vykazvaŭsia i Uładzimir Makiej, i Alaksandr Łukašenka.
«My paśladoŭna adznačajem važnaść zhurtavanaści i ŭzajemadziejańnia ŭ ramkach SND dla efiektyŭnaha adkazu na ahulnyja dla našych krain vykliki i pahrozy. U hetym kantekście my vykazali surjoznuju zakłapočanaść u suviazi z praktykaj nieabmiežavanaha i niapraŭnaha adnabakovaha sankcyjnaha presinhu na krainy SND zvonku, jaki pastajanna pašyrajecca», — kamientavaŭ Uładzimir Makiej.
U suviazi z hetaj zakłapočanaściu byli navat raspracavanyja šeść mier, zaklikanyja supolna reahavać dziaržavy na ekanamičny sankcyjny cisk. Płanujecca, što, kali adna ź dziaržaŭ-udzielnic sajuza paskardzicca na pryhniot, adrazu buduć pravodzicca acenki škody, kansultacyi, pieramovy z trecimi krainami, jakija mohuć dapamahčy minimizavać patencyjnuju škodu.
Łukašenku taksama vielmi chvalavała pytańnie padychodaŭ da košta- i taryfaŭtvareńnia na ahulnym rynku hazu sajuza i ŭstalavańnia taryfu na transparciroŭku hazu z trecich krain dla ŭnutranaha spažyvańnia. Adnak nijakich kankretnych rašeńniaŭ tut pryniata nie było.
Biełaruski bok adznačyŭ, što ŭ JEAES pakul zanadta mała zroblena pa impartazamiaščeńni i šyrejšym vykarystańni nacyjanalnych valut. Adnak, znoŭ ža, usie hetyja i inšyja niedachopy abmiarkoŭvalisia na ŭzroŭni prapanoŭ.
Samit SND u anłajn-farmacie
Nuda pa SSSR
Łukašenka jašče raz adznačyŭsia ŭ svajoj nudzie pa SSSR. Dla jaho SND — akurat alternatyva, jakaja «achoŭvaje sajuznyja respubliki ad chaosu i ekanamičnaha kałapsu».
Niežadańnie hladzieć na śviet šyrej, vychodziačy za miežy isnavańnia SSSR, padkreśliłasia i ŭ čarhovym zapeŭnivańni pradstaŭnikoŭ inšych krain: «Nas bolš nidzie nie čakajuć, rynki padzielenyja».
Asobna pradstaŭniki dziaržaŭ abmierkavali važnaść zachavańnia pamiaci pra Vialikuju ajčynnuju vajnu i syšlisia ŭ turbotach za Afhanistan: krainie budzie nakiravanaja humanitarnaja dapamoha ad SND.
Prapanova stvaryć adziny antyterarystyčny centr i Radu staršyniaŭ viarchoŭnych sudoŭ
Z navin na samicie — pryznačeńnie na pasadu kiraŭnika Antyterarystyčnaha centra SND: im staŭ načalnik Akademii FSB Jaŭhien Sysojeŭ. Z novaha hoda jon uznačalić baraćbu z teraryzmam u SND.
Što admietna, akramia Biełarusi, prablema ekstremizmu i teraryzmu ŭnutry dziaržavy vielmi chvaluje Tadžykistan. Mienavita Emamali Rachmon zajaviŭ, što ich turbuje dziejnaść šeraha zabaronienych arhanizacyj, jakija vykarystoŭvajuć placoŭki mižnarodnych i rehijanalnych struktur dla apraŭdańnia svaich niezakonnych dziejańniaŭ.
Płanujecca, što ŭ SND źjavicca adziny śpis terarystyčnych i ekstremisckich arhanizacyj, zabaronienych na terytoryi dziaržaŭ-udzielnic.
Rehulavać pakarańnie ekstremistaŭ i inšyja sudovyja pracesy pavinna budzie Rada staršyniaŭ viarchoŭnych sudoŭ. Mienavita pra jaje stvareńnie taksama damovilisia na samicie SND.
«Pakazalna, što ŭ Minsk nichto nie pryjechaŭ»
Palitołah Valeryj Karbalevič ličyć, što siońniašnija samity ŭ Minsku byli «pustymi» i pravodzilisia tolki tamu, što byli pryznačanyja pa płanie. Siensacyjnych zajaŭ i rašeńniaŭ, važnych i vyznačalnych dla losu Biełarusi, tam pryniata nie było.
«Cikava toje, što ŭ Minsk nichto nie pryjechaŭ, na što vielmi raźličvaŭ Alaksandr Łukašenka. Čamu byŭ važny vizit lidaraŭ inšych krain žyŭcom? Heta była b mocnaja demanstracyja, što nijakaj mižnarodnaj izalacyi i izhojstva niama, zamiežnyja lidary chacia b postsavieckaj prastory pryznajuć Łukašenku lidaram, isnuje niejkaja zamiežnapalityčnaja lehitymnaść.
Možna było b spasyłacca na karanavirus, ale na samit ADKB u Dušanbe ŭ vieraśni pryjechała šmat palitykaŭ. A tut sam Łukašenka zajaŭlaŭ, što Pucin 15-ha budzie ŭ Biełarusi, pres-sakratar Pucina Piaskoŭ taksama paćviardžaŭ heta.
Jašče 27 vieraśnia vykanaŭčy sakratar SND Siarhiej Lebiedzieŭ kazaŭ, što ŭsie lidary dziaržaŭ paćvierdzili svoj asabisty pryjezd u Minsk, a ŭ vyniku atrymaŭsia poŭny abłom. Mnie zdajecca, spačatku vyrašyŭ nie jechać Pucin, i heta stała admaškaj dla ŭsich astatnich.
Valeryj Karbalevič. Fota nv-online.info
Čamu Pucin usio ž znoŭ nie dajechaŭ da Biełarusi z ulikam taho, što nie byŭ tut z 2019 hoda (pry hetym Łukašenka naviedaŭsia da jaho ŭžo šeść razoŭ)? Valeryj Karbalevič vykazvaje niekalki hipotez:
«U jaho sapraŭdy mohuć być prablemy sa zdaroŭjem. Chacia na publicy jon źjaŭlajecca i sustrakajecca ź lidarami inšych krain. Tamu mnie padajecca, što heta pakarańnie Łukašenki za historyju z «Kamsamolskaj praŭdaj».
Łukašenka pastaviŭ Maskvu ŭ vielmi niazručnuju situacyju, i voś takimi drobnymi ŭkołami Kreml pomścić.
Tak, u Biełaruś učora zavitaŭ ministr zamiežnych spraŭ Siarhiej Łaŭroŭ, ale heta Pucinu ŭsio ž nie zamiena. Na moj pohlad, nazirajecca pachaładańnie adnosin Biełarusi i Rasii».
Varta dadać, što akurat Siarhiej Łaŭroŭ padčas svajho vizitu ŭ Minsk razam z Makiejem abmiarkoŭvaŭ pracu biełaruskich žurnalistaŭ u Rasii i naadvarot:
«U nas jość ahulnaje razumieńnie patreby zrabić usio, kab rasijskija ŚMI ŭ Biełarusi i biełaruskija ŚMI ŭ Rasii pracavali ŭ maksimalna kamfortnych umovach. U nas jość niekatoryja idei, jakija my budziem realizoŭvać chutkim časam». Praŭda, što heta za idei, pakul niezrazumieła.