Sieńjora zvolnili z EPAM za hamafobnyja kamientary ŭ LinkedIn
U LinkedIn skandał, jaki kaštavaŭ zavadataru pasady. Adzin raspracoŭščyk pažartavaŭ: pakul jon nie znajšoŭ muža-prahramista, kab nie pracavać na vulicy, jon pakidaje rekrucioram svaje kantakty. U kamientary pryjšoŭ sistemny inžynier z EPAM Mikita Pastuchoŭ i rezka vykazaŭsia pra homaseksuałaŭ (ciapier hetyja kamientary ŭžo vydalenyja). Kampanija nie zastałasia ŭ baku, piša dev.by.
Miesiac tamu inžynier-prahramist napisaŭ u LinkedIn: «Šukaju muža-prahramista» — i sabraŭ pad im amal 150 kamientaroŭ, u asnoŭnym biazzłobnych i z humaram. Na minułym tydni jon zrabiŭ post-apdejt, maŭlaŭ, muž jašče nie znojdzieny, a tym časam na vulicy chaładaje — i pakinuŭ svaje kantakty dla rekrucioraŭ.
Post zaŭvažyŭ sistemny inžynier z EPAM Mikita Pastuchoŭ (u LinkedIn u jaho ŭ jakaści miesca pracy pakazany minski ofis kampanii, adnak u šapcy profilu značycca: Kijeŭ, Ukraina). Zaviazałasia voś takaja pierapiska.
Praz paru dzion łancužok kamientaroŭ pad postam źnik. A ŭ samoha Pastuchova na staroncy źjaviłasia paviedamleńnie ab tym, što jon znachodzicca «ŭ pošuku novaj karjernaj mahčymaści».
Va ŭkrainskim ofisie EPAM paćvierdzili, što kampanija ŭ kursie jaho vykazvańniaŭ u sietcy LinkedIn. «Takija pavodziny źjaŭlajecca parušeńniem pryniataha ŭ kampanii kodeksa etyčnych pavodzin (Code of Ethical Conduct). Kampanija spyniła supracoŭnictva z hetym śpiecyjalistam».
U EPAM i raniej byli vypadki zvalnieńnia za vykazvańni ŭ sacyjalnych sietkach. Tak, u śniežni 2019 hoda teściroŭščyca Volha Małkina nazvała biełaruskuju movu «urodskaj» u fejsbuku. I, miarkujučy pa profili ŭ LinkedIn, u tym ža miesiacy jana pierastała pracavać u EPAM.
U kampanii tady skazali, što pracoŭnyja adnosiny byli spynieny pa pahadnieńni bakoŭ. Kamientavać detali admovilisia, spasłaŭšysia na niedatykalnaść pryvatnaj infarmacyi i svaju palityku.
A voś što ŭ EPAM raspaviali ŭ adkaz na pytańni dev.by pra toje, jakija nastupstvy moža paciahnuć pavodziny supracoŭnikaŭ na publičnych placoŭkach:
— U EPAM unikalnaja karparatyŭnaja kultura, kaštoŭnaści i etyčnyja normy, jakija padzialajuć i z razumieńniem prymajuć supracoŭniki pa ŭsim śviecie. Usie hetyja kaštoŭnaści prapisany ŭ našym Code of Conduct i ŭ tym liku raspaŭsiudžvajucca na vykazvańni ŭ sacyjalnych sietkach zhodna z Social Media Policy kampanii.
