Nie zmahli naviesić padatki i ŭzialisia za «varožaść»? Raskazvajem pra novuju spravu suprać Tutbaja
Piaty miesiac 11 supracoŭnikaŭ najbujniejšaha biełaruskaha anłajn-miedyja znachodziacca za kratami. Ich abvinavačvajuć va ŭchileńni ŭ spłacie padatkaŭ: nibyta kampanija niezakonna dałučyłasia da rezidentaŭ PVT, kab płacić mienš padatkaŭ. Siarod fihurantaŭ jość i žurnalisty, jakija pa svaich słužbovych abaviazkach nie źviazanyja ź jurydyčnaj i finansavaj dziejnaściu kampanii. I voś siońnia Śledčy kamitet zajaŭlaje, što zaviedziena jašče adna kryminalnaja sprava — ciapier za raspalvańnie varožaści. Pakul imiony fihurantaŭ nie nazyvajuć, ale krynicy paviedamlajuć, što naviesić novy artykuł, pa jakim pahražaje da 12 hadoŭ kałonii, mohuć akurat na žurnalistaŭ i redaktaraŭ.
Hiendyrektar kampanii Ludmiła Čekina i hałoŭny redaktar Maryna Zołatava, abiedźvie ŭžo piaty miesiac u SIZA
Voś što aficyjna paviedamlaje Śledčy kamitet: u adnosinach da słužbovych asob i supracoŭnikaŭ «TUT BAJ MIEDYJA» i inšych asob raspačata kryminalnaja sprava pa č. 3 art. 130 KK (Raspalvańnie rasavaj, nacyjanalnaj, relihijnaj albo inšaj sacyjalnaj varožaści abo roźni, ździejśnienaje hrupaj asob). Pa hetym artykule pahražaje ad 5 da 12 hadoŭ pazbaŭleńnia svabody.
U liku palityčnych artykułaŭ 130-y nabiraje abaroty. Kali raniej pa im karali ŭ asnoŭnym za vykazvańni ŭ padtrymku nacysckaj ideałohii, to apošnim časam — za materyjały, u jakich možna razhledzieć krytyku dziejnaj ułady. Apošnija masavyja zatrymańni za kamientary taksama byli pa art. 130 KK. Siarod žurnalistaŭ takoje abvinavačvańnie vystaŭlena Andreju Pačobutu, Dzianisu Ivašynu.
U parušeńnie mižnarodnych normaŭ sudy i siłaviki stali vyznačać siłavikoŭ jak asobnuju sacyjalnuju hrupu. Adpaviedna krytyčnyja materyjały, jakija staviać pad pytańnie zakonnaść dziejnaści takich struktur, stali razhladać u rečyščy raspalvańnia varožaści.
U ciapierašnich realijach dakazać nievinavataść nadzvyčaj składana. Prablema ŭ tym, što ŭ asnovu takich spraŭ kładziecca sam materyjał, u jakim siłaviki ŭhledzieli parušeńnie zakonu, i vysnovy praŭładnych ekśpiertaŭ. Sudy kateharyčna nie chočuć razhladać vysnovy niezaležnych ekśpiertaŭ, navat kali abarona prosić dałučyć materyjały da spravy.
Nahadajem, razhrom Tutbaja adbyŭsia 18 maja, sajt byŭ zabłakavany, dostupu da jaho niama i pa siońnia. Siłaviki pryjšli ŭ ofis kampanii i da supracoŭnikaŭ dadomu.
Zatrymali 15 čałaviek, u tym liku hienieralnaha dyrektara Ludmiłu Čekinu, hałoŭnaha redaktara Marynu Zołatavu (jany źjaŭlajucca i minarytarnymi akcyjanierami kampanii).
Ciapier za kratami zastajecca 11 čałaviek, dvoje jurystaŭ — pad zabaronaj na peŭnyja dziejańni, Julija Čarniaŭskaja, jakaja vałodaje mažyrytarnaj dolaj kampanii Hoster.by, — pad chatnim aryštam.
1-ha vieraśnia na svabodu vyjšaŭ hienieralny dyrektar Hoster.by Siarhiej Pavališaŭ, jahony advakat śćviardžaŭ, što jon pa-raniejšamu fihurant kryminalnaj spravy, jamu źmianili mieru ŭtrymańnia. Adnak Juryj Vaskrasienski, jaki pazicyjanuje siabie jak pasiarednik u daterminovym vyzvaleńni palitviaźniaŭ, zajaŭlaŭ, što Pavališaŭ źviarnuŭsia z prośbaj ab pamiłavańni, i heta prośba była vykanana. Kampanija bolš nie ŭkazvaje Pavališava ŭ śpisie zatrymanych.
17 žniŭnia sud pryznaŭ Tutbaj ekstremisckim resursam, a taksama novy sajt, jaki stvaryła častka byłych žurnalistaŭ miedyja. Dostup da Tutbaja ŭsio jašče zabłakavany, to-bok artykuły, jakija śledstva pakłała ŭ materyjały kryminalnaj spravy, niedastupnyja da prahladu.
