Budsłaŭski kaścioł całkam nakryty časovym dacham, nieŭzabavie adnoviacca nabaženstvy
Pra chod restaŭracyjnych rabot partału Catholic.by raskazaŭ probašč parafii Dźmitryj Dubovik.
«My zrabili nieabchodnuju prajektnuju dakumientacyju, u adpaviednaści ź joj ustalavali krokvy i nakryli baziliku časovym dacham, — raspavioŭ Dźmitryj Dubovik. — Novyja krokvy — heta mietaličnyja fiermy, jakija nie tolki niasuć dach, ale i źjaŭlajucca svojeasablivymi ściažkami dla sklapieńniaŭ u vierchniaj častcy budynka. Papiarednija krokvy z dreva takoj dadatkovaj funkcyi nie vykonvali: jany prosta abapiralisia na ścieny. Akramia taho, jany stajali čaściej, a mietaličnyja fiermy dajuć mahčymaść źmienšyć kolkaść materyjału, što zaŭvažna ablehčyła ahulnuju vahu kanstrukcyi.
Da zimy my nakryli kaścioł časovym dacham z acynkavanaha prafilavanaha naściłu. Zrabić kapitalny novy dach ź miedzi nie atrymałasia ź dźviuch pryčyn: nie chapała času i srodkaŭ.
Dla miednaha dachu, jaki, darečy, vielmi doraha kaštuje, spatrebiacca taksama draŭlanyja łaty, i ŭžo na ich budzie naściłacca čarnavy dach i miedź. Pakul našaj zadačaj było nakryć sklapieńnie, jakoje i tak mocna paciarpieła ad vady padčas tušeńnia pažaru i mocnych daždžoŭ, jakija časta išli sioleta. Z hetaj zadačaj my, dziakuj Bohu, spravilisia.
Za ŭsio, što było zroblena (a heta sapraŭdy šmat), ja ščyra dziakuju ŭsim achviaradaŭcam, jakija źbirali na heta srodki, vałancioram, jakija dapamahali raźbirać zavały, prybirali śmiećcie i rabili šmat inšaj karysnaj i patrebnaj pracy, a taksama budaŭnikam, jaki pracujuć na kaściole biez vychodnych vachtavym mietadam.
Spadziajusia, što da ŭračystaści Usich Śviatych (jana adbyvajecca 1 listapada — NN) my pačniom malicca ŭ kaściole», — padzialiŭsia płanami ksiondz Dźmitryj.
