Namieśnik kiraŭnika SK zajaviŭ pra 2700 palityčnych, pravaabaroncy viedajuć tolki 1600 ź ich
«Ciapier zavieršana rasśledavańnie pa 2000 pratesnych kryminalnych spravach u dačynieńni da amal 1500 čałaviek», — zajaviŭ u intervju dziaržaŭnamu ahienctvu BiełTA pieršy namieśnik staršyni Śledčaha kamiteta Aleh Šandarovič.
«Ciapier u vytvorčaści znachodziacca kala 1100 kryminalnych spraŭ u dačynieńni da bolš jak 1200 fihurantaŭ», — dadaŭ jon.
Takim čynam, ahułam zavieršana ci rasśledujecca 3100 kryminalnych spraŭ adnosna 2700 čałaviek.
Treba dumać, što ŭ hetuju kolkaść nie ŭvajšli spravy, što aficyjna majuć ekanamičny, a nie palityčny charaktar, jak sprava Viktara Babaryki, jaki kinuŭ Alaksandru Łukašenku vyklik na prezidenckich vybarach, abo sprava Tut.baja, pa jakoj prachodziać 15 čałaviek.
Miž tym pravaabaroncam viadomyja imiony tolki prykładna 1600 fihurantaŭ kryminalnych spraŭ, abo trochi bolš za pałovu. Supastaŭleńnie hetych ličbaŭ daje ŭjaŭleńnie pra maštab palityčnych represij u krainie.
«U maštabach krainy heta zusim niašmat. Mierkavańnie ab zvyšmasavaści pratestaŭ pamyłkovaje», — zajaviŭ pra heta Aleh Šandarovič, jaki na momant vybaraŭ 2020 hoda pracavaŭ kiraŭnikom Śledčaha kamiteta pa Hrodzienskaj vobłaści, paśla čaho atrymaŭ pavyšeńnie ŭ stalicu.
«Što tyčycca złačynstvaŭ, źviazanych z pratesnymi akcyjami, to z 9 žniŭnia minułaha hoda ich zarehistravana bolš za 5 tysiač», — adznačyŭ Šandarovič.
«Płanavaja praca pa vyjaŭleńni aktyŭnych udzielnikaŭ pratestaŭ praciahvajecca», — skazaŭ jon i zaklikaŭ tych, chto braŭ udzieł u «masavych biesparadkach», źjavicca z pryznańniem viny.
Šandarovič patłumačyŭ aktyŭny ŭdzieł u pratestach niekatorych supracoŭnikaŭ dziaržaŭnych struktur nastrojami ŭ siemjach. «Na mnohich paŭpłyvaŭ navat nie anturaž, atmaśfiera taho pieryjadu abo infarmacyjny cisk, a cisk svajakoŭ. U mnohich siemjach ludzi pa-roznamu aceńvali situacyju — adbyvaŭsia raskoł. Psichałahičny cisk byŭ nie tolki na infarmacyjnym uzroŭni, a hłybiej — siamiejna-bytavym», — skazaŭ jon.
