«Milicyjaniery ŭ šoku, bajacca, što prasłuchoŭvali kožnaha». Byłyja siłaviki pra toje, jak adreahavali na źlivy ŭ MUS
Pracu ŭ rajonnych adździełach unutranych spraŭ pieravodziać na papieru, kamunikacyju anłajn — na listavańnie zvyčajnaj poštaj. Byłyja siłaviki raskazali «Našaj Nivie», jak ich dziejnyja kalehi adreahavali na źlivy chakieraŭ i rasśledavańni, što pravodzilisia apošnim časam.
«Karajeŭ navat na zvanki ad svaich znajomych nie adkazvaŭ»
«My nieadnarazova čuli ad ludziej u sistemie MUS, što jany ŭsie ŭ šoku ad uzłomu bazy danych. Adzin supracoŭnik, naprykład, pramym tekstam piša nam: «Usie ŭ ach*ie». Šarahovyja milicyjanty ŭvohule nie razumiejuć, jak takoje mahčyma», — raskazvaje «NN» pradstaŭnik abjadnańnia byłych siłavikoŭ.
Pa jaho słovach, dziejnyja supracoŭniki bajacca, što prasłuchoŭvali kožnaha i što ciapier moža stać publičnaj ichniaja krytyka načalstva.
U novym źlivie siłaviki abmiarkoŭvajuć pres-sakratarku MUS Volhu Čamadanavu
«Biezumoŭna, u pryvatnych razmovach usie abmiarkoŭvajuć svajo kiraŭnictva. Krytykujuć jaho. Tamu ludzi bajacca, što hetyja razmovy buduć skarystanyja suprać ich», — kaža naš surazmoŭca.
Pra reakcyju hierojaŭ apošnich źlivaŭ pakul nieviadoma. Ale krynicy kažuć, što były ministr unutranych spraŭ Juryj Karajeŭ, naprykład, paśla źlivaŭ z zapisam jahonaha vystupu try dni nie adkazvaŭ na zvanki pa telefonie.
«Jon navat na zvanki ad svaich znajomych nie adkazvaŭ», — havoryć były siłavik.
«Pakazalnaj reakcyi Ministerstva ŭnutranych spraŭ na źlivy, vierahodna, nie budzie»
«Pakazalnaj reakcyi Ministerstva ŭnutranych spraŭ na źlivy, vierahodna, nie budzie. U Ministerstvie, chutčej za ŭsio, praciahnuć rabić vyhlad, što ničoha nie adbyłosia. Da nas dachodzić infarmacyja, što jość zahad nikoha nie zvalniać i nie karać, kab pakazać supracoŭnikam, što akcyja nie mieła surjoznych nastupstvaŭ.
Chacia, ja dumaju, za heta treba kahości pasadzić u turmu, bo hetyja danyja byli zachavanyja aby-jak, što pryviało da ich uciečki. Za heta pavinny ludzi być pakaranyja», — ličyć naš surazmoŭca.
Źjaviłasia dadatkovaje rasśledavańnie pa śmierci Bandarenki. Jakija novyja rečy adtul viadomyja?
U toj ža čas, jak stała viadoma byłym siłavikam, KDB zavioŭ kryminalnuju spravu pa fakcie ŭzłomu. Pa ich infarmacyi, z Departamienta zabieśpiačeńnia daapieratyŭnaj dziejnaści zabrali ŭsio sierviernaje abstalavańnie, kab šukać dzirki, adkul uciakła infarmacyja. Kažuć, što abstalavańnie zabirali supracoŭniki AAC.
«Składvajecca ŭražańnie, što ŭ Ministerstvie dahetul nie zrazumieli, jak mahli zdarycca ŭciečki. Pryčynu ja baču ŭ pavalnym hałavaciapstvie i ŭ techničnaj niekampietentnaści», — havoryć pradstaŭnik byłych siłavikoŭ.
«Pracu pieravodziać na papieru i zvyčajnuju poštu»
Byłym siłavikam na siońnia viadomyja niekatoryja nastupstvy źlitych razmoŭ i baz danych.
Jany śćviardžajuć, što ŭ RAUSach ciapier niedasiažny anłajn-bilinh — adsočvańnie miescaznachodžańnia čałavieka.
«Raniej dla hetaha vykarystoŭvaŭsia bank danych «Majak». A voś paśla ŭciečki infarmacyi hety bank danych zabrali z terytaryjalnych RAUSaŭ. Punkty dostupu zastalisia tolki ŭ abłasnych upraŭleńniach.
I ciapier supracoŭniki rajonnych adździełaŭ vymušanyja dasyłać piśmovyja zapyty pa zvyčajnaj pošcie, kab atrymać źviestki bilinhu, — havoryć surazmoŭca «NN». — Pakolki zapytaŭ šmat, a razhladajucca jany pa čarzie, heta ŭpłyvaje na chutkaść reahavańnia na złačynstvy».
Pa-druhoje, kažuć byłyja siłaviki, z RAUSaŭ zabrali punkty dostupu da prasłuchoŭki telefonnych razmovaŭ, što na aficyjnaj movie nazyvajecca «apieratyŭna-techničnymi mierapryjemstvami №2.
«Raniej prosta z RAUSa supracoŭnik moh prasłuchoŭvać, što havorać ci havaryli fihuranty pa kryminalnych spravach, — havoryć pradstaŭnik abjadnańnia. — Ciapier treba spačatku pisać zapyt u Departamient zabieśpiačeńnia daapieratyŭnaj dziejnaści u Miensku ci ŭ jahonyja abłasnyja padraździaleńni. Tam patrebnyja zapisy razmovaŭ zapišuć na CD-dysk i vyšluć u rajonny adździeł.
Usio heta ŭskładniaje pracu i pakazvaje toj chaos, jaki adbyvajecca ŭ sistemie MUS. Moža, jany dumali, što praz hetyja punkty ŭ RAUSach byli źlivy? Niezrazumieła».
«Paśla źlivaŭ i rasśledavańniaŭ dziejnyja siłaviki stali čaściej źviartacca da nas»
«Paśla źlivaŭ i rasśledavańniaŭ dziejnyja siłaviki stali čaściej źviartacca da nas i dasyłać unutranuju infarmacyju. Časam heta raspoviedy pra toje, što adbyvajecca ŭ RAUSach. A časam my atrymlivajem i słužbovyja dakumienty. Skačok nie rezki, ale infarmacyi stała źlivacca bolš. I kantaktaŭ u nas stała bolej», — raspaviadaje pradstaŭnik abjadnańnia eks-siłavikoŭ.
Jany ličać, što dziakujučy publikacyi telefonnych razmoŭ da milicyjantaŭ prychodzić razumieńnie: Ministerstva nie moža abaranić svaich supracoŭnikaŭ. Bo akazvajecca, što ciapier možna absalutna ŭsio daviedacca pra luboha supracoŭnika.
«Heta ŭpłyvaje na ich. Niezadavolenaść słužbaj, biezumoŭna, stała bolšaj. Asabliva siarod šarahovych supracoŭnikaŭ, jakija nie bačyli katavańniaŭ i vieryli słovam ideołahaŭ», — havorać u abjadnańni.
Byłyja siłaviki dadajuć, što ŭ MUS praciahvajecca tendencyja na zvalnieńni. Jana pačałasia, pa ich słovach, sa žniŭnia 2020 hoda.
***
Nahadajem, Ministerstva ŭnutranych spraŭ Biełarusi da hetaha času aficyjna nie prakamientavała źlivy z aŭdyjazapisami razmoŭ, na jakich čujucca hałasy, padobnyja da hałasoŭ dziejnych supracoŭnikaŭ. Taksama aficyjna nie było nijakich kamientaroŭ pra źlivy chakieraŭ z aŭtamatyčnaj infarmacyjnaj sistemy «Pašpart» i hetak dalej.
Jak tolki źjaviacca aficyjnyja kamientary, my ich abaviazkova apublikujem.
