Prezident Duda na siesii Hienasamblei AAN: 150 tysiač biełarusaŭ atrymali prytułak i pracu ŭ Polščy
Andžej Duda padniaŭ temu mihracyjnaha kryzisu na miažy ź Biełaruśsiu, vystupajučy na ahulnapalityčnych debatach 76-j siesii Hienasamblei AAN, piša TASS.
Pavodle jaho słoŭ, Varšavie davodzicca płacić canu za padtrymku, jakuju jana akazvaje biełaruskim hramadzianam u apošnija miesiacy. Jak miarkuje polski lidar, adkazam biełaruskich uładaŭ na hetuju dapamohu «była niabačanaja hibrydnaja ataka na miažy Polščy, Łatvii i Litvy — troch krain na ŭschodnim fłanhu NATO i ES».
Pa słovach Dudy, biełaruskija ŭłady «pryvoziać u svaju krainu dziasiatki tysiač rašuča nastrojenych žycharoŭ dziaržaŭ Blizkaha Uschodu, jakich pad pałkami palicejskich prymušajuć pierasiakać miežy, sprabujučy spravakavać štučny humanitarny kryzis».
«My nie adstupim u hetym kryzisie, tamu što my nie zhodnyja na instrumientalny padychod da mihrantaŭ, na vykarystańnie ich składanaha stanovišča ŭ jakaści instrumienta dziejańniaŭ, nakiravanych suprać biaśpieki našych miežaŭ, miežaŭ, jakija my abaviazany abaraniać, u tym liku jak kraina ES», — skazaŭ Duda.
Taksama Andžej Duda zajaviŭ, što kala 150 tys. biełarusaŭ za apošni čas atrymali prytułak i pracu ŭ jaho krainie.
«Niadaŭna ja skazaŭ našym biełaruskim bratam, što im tut radyja i što Polšča budzie ich domam da taho času, pakul jany buduć ličyć heta metazhodnym i nieabchodnym. Ja ćviorda prytrymlivajusia hetych słoŭ».
Andžej Duda adznačyŭ, što sa žniŭnia minułaha hoda tysiačy biełarusaŭ vychodziačy na mirnyja akcyi pratestu sutykalisia z dubinkami, ślozatačyvym hazam i navat kulami. Jon dadaŭ, što ŭ Biełarusi naličvajecca bolš za 650 palitviaźniaŭ. Taksama Duda prainfarmavaŭ Hienasambleju ab prysudach, vyniesienych Maryi Kaleśnikavaj i Maksimu Znaku.
«Niadaŭna sud prysudziŭ dvaich ź ich — Maryju Kaleśnikavu i Maksima Znaka - da 10 i 11 hadoŭ pazbaŭleńnia voli. Razam ź imi lidary polskaj mienšaści ŭ Biełarusi — Anžalika Borys i Andžej Pačobut — znachodziacca ŭ turmach i aryštavanyja za svaju demakratyčnuju dziejnaść», — skazaŭ Duda.
Jon zapatrabavaŭ ich vyzvaleńnia i zaklikaŭ mižnarodnuju supolnaść z bolšaj salidarnaściu ź biełaruskim narodam.
«My patrabujem ich vyzvaleńnia i bolšaj salidarnaści mižnarodnaj supolnaści z narodam Biełarusi, jaki prosta choča sumlennaj dziaržavy, sumlennaj demakratyi» — skazaŭ jon.
