Za 5 hadoŭ u Biełarusi vyžyła tolki adno z dvuch novych pradpryjemstvaŭ
Siarod zarehistravanych u 2015 hodzie ŭ Biełarusi pradpryjemstvaŭ da 2020 dažyła tolki kožnaje druhoje.
Pra heta havorycca ŭ statystyčnym biuleteni «Biznes-demahrafija ŭ Respublicy Biełaruś, 2021», paviedamlaje thinktanks.by.
U 2015 hodzie ŭ krainie «naradziłasia» 8832 pradpryjemstvy. Adnak da 2020 hoda ź ich «vyžyła» tolki 4 tysiač 594 pradpryjemstvy abo 52%. Najbolšuju žyvučaść prademanstravali kampanii Hrodzienskaj vobłaści. Tam kolkaść vyžyłych skłała 60,9%. Najmienšaja vyžyvalnaść u firmaŭ Mahiloŭskaj vobłaści — 49,3%. Dola pradpryjemstvaŭ, jakija byli zarehistravanyja ŭ 2015 hodzie i dažyli da 2020 u Minsku, supała z ahulnabiełaruskim pakazčykam — 52%.
Jak pakazvaje statystyka, u 2020 hodzie ŭ Biełarusi zafiksavany spad rehistracyi novych kampanij. Kali ŭ 2019 hodzie ŭ krainie źjaviłasia 9293 novyja pradpryjemstvy, to ŭ 2020 hodzie — 7153. Spad byŭ zafiksavany i siarod aktyŭna dziejnych pradpryjemstvaŭ. U 2019 hodzie takich było 106 916 adzinak, a ŭ 2020 — 104 877. U toj ža čas źviestak pa «pamierłych» pradpryjemstvach za 2020 hod u statystyčnym biuleteni niama. Tamu nielha zrazumieć, ci pieravysiła ŭ pandemijny hod «śmiarotnaść» pradpryjemstvaŭ ich «naradžalnaść».
