Śpiecyjalisty bjuć tryvohu: brakańjerskija «televizary» stali lehalnym srodkam vyłavu ryby
21 lipienia 2021 hoda ŭ Biełarusi ukazam zaćvierdžanyja praviły amatarskaha rybałoŭstva. Ciapier jany dazvalajuć lehalna łavić rybu rybałoŭnymi ekranami, tak zvanymi «televizarami». Śpiecyjalisty tłumačać, u čym ich pahroza dla faŭny vadajomaŭ.
Rybałoŭny ekran — heta samarobnaja snaść, jakaja ŭjaŭlaje saboj dva pruty, pamiž jakimi naciahnuta sietka. Pryłada źmiaščajecca ŭ vadu, zvyčajna na pratokach i na płytkavodździ ŭ zatocy, i pakidajecca tam.
«Ja admoŭna staŭlusia da ŭsich samałoŭnych srodkaŭ, jakija łoviać rybu biez udziełu rybaka», — kaža śpiecyjalist APB pa pryrodaachoŭnych pytańniach Siarhiej Zujonak. — «Časta byvaje, što takuju sietku-«televizar» pastavili i zabyli, i tudy traplaje ryba i hinie. U tym liku mohuć traplać i «čyrvanaknižnyja» vidy. U vyniku «televizar» stanovicca efiektyŭnym i doŭhaterminovym, uličvajučy, što robiać jaho ź sintetyčnaj sietki, prystasavańniem dla źniščeńnia vodnaj faŭny».
«Televizary» mohuć zabivać nie tolki rybu, ale i ptušak.
Ciapier artykuł 13 Pravił amatarskaha rybałoŭstva dazvalaje ŭ rybałoŭnych uhodździach vykarystoŭvać na rybałova pa dva «televizary» pamieram nie bolej za 1 ch 1,5 mietra i krokam jačejki nie bolej za 30 mm.
Zaołah Michaił Maksimienkaŭ, staršy navukovy supracoŭnik Navukova-praktyčnaha centra NAN pa bijaresursach:
«Ja liču heta ekałahična škodnym rašeńniem, niesumlennym u adnosinach tych rybakoŭ, jakija zakonnymi snaściami łoviać rybu, dumajuć, jak adnavić rybnyja zapasy, kab imi ŭstojliva karystacca. Kolki my zmahalisia, kab stvaryć umovy dla nierastu, adnaŭlali nieraściliščy. U Vilejskim rajonie my z susiedziami i siabrami adnavili pratok na starycu šyrynioj 4-5 m. Kolki my zmahalisia ź miascovymi brakańjerami, kab jany nie stavili tam pryłady łovu: pierad nierastam tam łovicca taja ryba, jakaja niasie ŭ sabie dziasiatki tysiač ikrynak! Adłaviŭ takich dziasiatak — i nieraścicca niama kamu. Hadoŭ piać jak adbili achvotu brakańjeraŭ, jany zrazumieli, što ŭsie rybaki miascovyja pilnujuć i paviedamlajuć u dziaržinśpiekcyju. A ciapier usie vysiłki i praca ludziej, jakija zmahalisia za cyvilizavany padychod da rybałoŭstva, pierakreśleny: na zakonnaj padstavie jany pryjduć utraich-čatyroch i pieraharodziać starycu — užo ničoha nie skažaš. Zaklikać da sumleńnia brakańjera — apošniaja sprava, sumleńnia ŭ jaho niama, heta ŭ jaho ŭžo hramadzianskaja pazicyja».
