Pandemija moža źmianicca tvindemijaj: daktary bajacca adnačasovaj navały hrypu i karanavirusa
Miedyki bajacca, što špitali nie spraviacca ź vialikaj nahruzkaj.
Fota pixabay.com.
Ekśpierty čakajuć, što siezon hrypu, jaki nadychodzić, budzie našmat bolš ciažki, čym u minułyja hady. Pryčyna — toje, što špitali, i tak pierapoŭnienyja praz raspaŭsiud štama kavidu «delta», mohuć nie vytrymać pavyšanaj nahruzki.
Rost zachvorvańniaŭ na hryp taksama moža pačacca raniej, čym zvyčajna, i zakranuć bolšuju kolkaść ludziej, bo šmat ludziej pracavali z domu i paźbiahali kamunikacyi ź inšymi. Heta pieraškodziła im vypracavać pryrodnuju imunnuju abaronu suprać chvarob, tłumačyć Wall Street Journal.
Uiljam Šafnier, prafiesar adździaleńnia infiekcyjnych chvarob z amierykanskaha ŭniviersiteta Vanderbilta, kaža, što ŭ samym horšym vypadku nas moža čakać sapraŭdnaja tvindemija, kali spatrebicca zmahacca z hrypam na adnym uzroŭni z kavidam. Pa słovach Šafniera i šerahu inšych ekśpiertaŭ, hetamu moža spryjać niekalki faktaraŭ, ale pakul ciažka pradkazać, nakolki napružanym budzie siezon hrypu.
Siarod takich faktaraŭ jość toje, što šmat dziaciej viartajecca ŭ škoły, dzie jany mohuć padchoplivać infiekcyi ci raspaŭsiudžvać ich. Darosłyja, u svaju čarhu, admaŭlajucca ad pryščepak suprać hrypu, bo ŭžo atrymali supraćkavidnuju vakcynu i nie chočać inšych pryščepak.
U dadatak, šmat ludziej bolš nie vykarystoŭvajuć maski i inšyja srodki indyvidualnaj abarony, jakija nie tolki strymlivali raspaŭsiud kavidu, ale i dapamahali zmahacca ź inšymi infiekcyjami. Sioletnija pryščepki ad hrypu taksama mohuć być mienš efiektyŭnymi, čym zvyčajna, bo ŭ hetym hodzie virus cyrkuliravaŭ siarod nasielnictva nie nadta aktyŭna, tamu daśledčykam bolš ciažka zrazumieć, suprać jakich štamaŭ hrypu pavinna abaraniać sioletniaja vakcyna.
Amierykanskija ŭłady spadziajucca, što vakcynacyja suprać hrypu dapamoža trymać situacyju pad kantrolem. Ahienctva «Centry pa kantrolu i prafiłaktycy zachvorvańniaŭ ZŠA» śćviardžaje, što vakcyny ad kavidu i hrypu možna ŭvodzić adnačasova, i płanuje ličbavuju kampaniju, kab matyviravać ludziej atrymać pryščepku. Taksama ahienctva vydzialaje bolš za 150 miljonaŭ dalaraŭ, kab padtrymać kampanii na roznych uzroŭniach, nakiravanyja na pavyšeńnie ŭpeŭnienaści ŭ vakcynach suprać kavidu i hrypu siarod rasavych i etničnych mienšaściaŭ u ZŠA.
