«Mama nie daje pakazańniaŭ». Dačka hałoŭnaha redaktara BiełaPAN atrymała ad maci pakul adzin list za try tydni
Ź SIZA na Vaładarskaha Hańnie Leŭšynaj z 18 žniŭnia pryjšoŭ tolki adzin list ad maci, hałoŭnaha redaktara BiełaPAN Iryny Leŭšynaj. Jana napisała jaho ŭ pieršy dzień, paviedamlajuć naviny.online.
«U mianie dobryja susiedzi — heta na siońnia hałoŭnaje. Vučusia mieć znosiny z roznymi katehoryjami ludziej. Jašče pa ranicach tut harłapaniać čajki, jakija prylatajuć sa Śvisłačy i, napeŭna, pralatajuć mima majho doma taksama. Heta hreje dušu», — cytuje list mamy Hanna.
«Sa słoŭ advakata, jana adčuvaje siabie dobra. Nijakich śledčych dziejańniaŭ nie prachodzić, tamu što mama nie daje pakazańniaŭ», — dadała dačka.
Hałoŭnaha redaktara i dyrektara BiełaPAN Irynu Leŭšynu i byłoha dyrektara Dźmitryja Navažyłava zatrymali 18 žniŭnia. Spačatku — pa padazreńni ŭ arhanizacyi abo padrychtoŭcy dziejańniaŭ, jakija hruba parušajuć hramadski paradak. Ale zatym vystavili abvinavačvańnie pa artykule ab uchileńni ad vypłaty padatkaŭ.
