Taliban śćviardžaje, što pravincyja Pandžšer zavajovanaja. Ale dakładna heta jašče nieviadoma
Taliby abviaścili pieramohu nad supracivam u pravincyi Pandžšer, što znachodzicca na paŭnočnym uschodzie ad Kabuła. Heta apošni rehijon Afhanistana, jaki znachodziŭsia pa-za miežami kantrolu Talibana. Ale, pa śviedčańniach paŭstancaŭ, pandžšerski supraciŭ praciahvajecca da hetaha času.
6 vieraśnia hrupoŭka raźmiaściła ŭ internecie videa taho, jak nad Pandžšeram uzdymajecca ściah talibaŭ. Tym nie mienš, bajcy supracivu śviedčać, što jany ŭsio jašče znachodziacca va ŭsich stratehična važnych pazicyjach u rehijonie i praciahvajuć zmahacca, piša VVS.
Kiraŭnik pandžšerskich siłaŭ Achmad Masud, jaki ŭznačalvaje Front nacyjanalnaha supracivu Afhanistana, zaklikaŭ da nacyjanalnaha paŭstańnia suprać Talibana. U aŭdyjazapisu, raźmieščanym u sacyjalnych sietkach, Masud abvinavaciŭ mižnarodnuju supolnaść u lehitymizacyi ruchu talibaŭ. Pa słovach kiraŭnika supracivu, toje, što ciapier adbyvajecca ŭ Afhanistanie, adkinie krainu «nazad, u ciemru, daloka ad luboj kultury, mastactva i adzinstva», a taksama vyklikaje poŭnuju izalacyju Afhanistana ad usiaho śvietu.
U hornaj dalinie Pandžšer, što znachodzicca za 144 kiłamietry ad Kabuła, žyvuć prykładna 150-200 tysiač čałaviek. Rehijon byŭ centram supracivu nie tolki pry ciapierašnim nastupleńni talibaŭ, ale i padčas saviecka-afhanskaj vajny ŭ 1980-ja, a taksama pry minułym praŭleńni talibaŭ u Afhanistanie ŭ pieryjad z 1996 pa 2001 hady.
Ruch «Taliban» uziaŭ Afhanistan pad kantrol try tydni tamu. Niečakana paśpiachovaja dla talibaŭ vajennaja kampanija skončyłasia zachopam Kabuła 15 žniŭnia i kracham miascovaha ŭrada, padtrymanaha zachodnimi krainami. Pandžšerski supraciŭ doŭžycca ŭžo dva tydni.
