U śviecie źjaŭlajecca ŭsio bolš klimatyčnych kafe. Što heta takoje?
Hłabalnaje paciapleńnie — adna z tych tem, na jakuju nie ŭsie hatovyja havaryć. Tyja miery, jakija varta prymać i na asabistym, i na dziaržaŭnym uzroŭni ŭ suviazi z klimatyčnym kryzisam, naŭrad ci vyhladajuć pryjemnymi i prostymi dla razumieńnia. Ale što rabić tym ludziam, chto ŭsio-taki chacieŭ by padzialicca ź inšymi svaimi tryvohami nakont stanu ekałohii?
Dla hetaha prydumali klimatyčnyja kafe — sustrečy, dzie tema klimatu nie tolki padtrymlivajecca, ale i ŭvohule źjaŭlajecca asnoŭnaj. Ź ciaham času ŭsio bolš ciažka ihnaravać nastupstvy źmien klimatu, adpaviedna, siarod ludziej raście zakłapočanaść nakont prablem ekałohii. Tamu klimatyčnyja kafe nabirajuć papularnaść u roznych krainach śvietu, piša Guardian.
Nie zusim jasna, chto pieršy stvaryŭ ideju klimatyčnych kafe. Ale, chutčej za ŭsio, jany pajšli ad tak zvanych kafe śmierci — sustreč, jakija pačali arhanizoŭvać u Brytanii. Na takich mierapryjemstvach u spakojnaj atmaśfiery i za kubkam harbaty ź piečyvam možna pahutaryć pra śmiarotnaść.
Arhanizatary klimatyčnych kafe padkreślivajuć, što na takich mierapryjemstvach nie budzie lekcyj ci zaprošanych śpikieraŭ, udzielnikaŭ sustreč taksama nie zaklikajuć ni da jakich mier, źviazanych z ekałahičnym ładam žyćcia. Sens padobnych sustreč — mahčymaść padzialicca ŭłasnymi dumkami i adčuvańniami nakont hłabalnaha paciapleńnia. Tamu klimatyčnyja kafe padychodziać i dla tych, chto nie hatovy, naprykład, da sarciroŭki śmiećcia ci admovy ad škodnych dla ekałohii zvyčak. Ciapier takija mierapryjemstvy ładziać u Brytanii, Francyi, Niderłandach, ZŠA i inšych krainach.
Ale dla niekaha hutarki na padobnych sustrečach sapraŭdy mohuć stać matyvacyjaj dla pierachodu na bolš ekałahičny ład žyćcia. U takim vypadku arhanizatary prapanujuć pačać z taho, kab bolš havaryć pra źmieny klimatu — navat u čarzie da kasy ŭ supiermarkiecie. Kali jość siły na aktyŭnyja dziejańni, možna pierachodzić na bolš ekałahičny transpart nakštałt viełasipieda, sarciravać śmiećcie i h. d.
