Mahčymyja straty z-za sankcyj — 1,8 miljarda dalaraŭ. Što budzie ź Biełarusbankam?
«Našaj Nivie» stała viadoma, jak zachodnija sankcyi mohuć paŭpłyvać na stan Biełarusbanka. Apošni kvartał bank adpracavaŭ sa stratami ŭ niekalki dziasiatkaŭ miljonaŭ dalaraŭ, kredytnyja prajekty syplucca, zamiežnyja partniory pahražajuć spahnańniem astranamičnaj sumy.
Na ciapierašni momant pasivy banka składajuć 40 miljardaŭ rubloŭ, ź ich kala 8 miljardaŭ dalaraŭ valutnych srodkaŭ. Dola źniešniaha fandzirvańnia ŭ valutnych pasivach składaje 30%, bolš za pałovu ź ich — daŭhi pierad bankaŭskimi strukturami ES.
Stupień naŭprostavaj zaležnaści banku ad finansavańnia rezidantaŭ ES adnosna ścipłaja: tolki 4% ad usich pasivaŭ.
I chacia moža padacca, što heta mała, nasamreč pytańnie treba razhladać nie z pazicyi ahulnaha bałansu, a z pazicyi najaŭnaści valuty.
A ź joj situacyja takaja: praz sankcyi Biełarusbank znachodzicca pad pahrozaj adtoku 1,8 miljarda dalaraŭ. Pakul partniory nie zapatrabavali daterminovaha pahašeńnia raniejšych kredytaŭ i štrafaŭ.
Ale ŭ damovach z zamiežnymi kredytorami (u tym liku kitajskimi i rasijskimi, samo saboj i zachodnimi) praduhledžany kavienanty (štrafnyja sankcyi) u vypadku, kali bank trapić pad sankcyi ci vylecić ź mižnarodnych rejtynhaŭ — a heta ŭžo adbyłosia.
U samym niehatyŭnym scenary z banka spahoniać 22% usich jaho valutnych pasivaŭ, heta najmahutniejšy ŭdar pa likvidnaści banka, što moža vyklikać dalejšy adtok resursaŭ i klijentaŭ z banka.
Zamiežnyja banki admaŭlajucca supracoŭničać ź Biełarusbankam, heta bje pa tutejšych jurydyčnych asobach. Vyhladaje heta tak.
U Biełarusi pradpryjemstvy nie mohuć prosta tak brać kredyty ŭ zamiežnych bankach, jany majuć heta rabić tolki praź miascovyja banki.
Paśla ŭviadzieńnia sankcyj «advaliłasia» ŭžo 90 miljonaŭ kredytnych dalaraŭ dla biełaruskich vytvorcaŭ, jakija mielisia pastupić biełaruskim jurasobam praź Biełarusbank.
Heta nie ŭličvajučy zavisłuju kredytnuju liniju na 580 miljonaŭ dalaraŭ dla «Słaŭkalija» — dafinansavać hety prajekt sam Biełarusbank nie ŭ stanie, a kali zamarozić, pierśpiektyvy ŭ prajektu cmianyja. Nahadajem, kitajcy vydali kredyt Huceryjevu pad harantyi ŭrada.
Čytajcie taksama: Krynicy: U Huceryjeva vialikija prablemy — kitajcy zamarozili 580 miljonaŭ dalaraŭ na budanictva Niežynskaha kambinata
Mižnarodnyja strachavyja kampanii i zamiežnyja banki ihnarujuć zapyty biełaruskaha boku ab pryčynach takoha staŭleńnia i admaŭlajucca ad supracoŭnictva.
Prablemy z zavisłymi płaciažami klijentaŭ pakul nie majuć sistemnaha charaktaru — u zamiežnych bankach zaviśli tolki 4 miljony dalaraŭ.
Aproč taho, zachodnija finansavyja instytucyi admaŭlajucca kredytavać Biełarusbank, a rasijanie zadzirajuć staŭki i prapanujuć brać kredyty ŭ rasijskich rublach pad 13,5% hadavych. Dla prykładu, karotkija kredyty ŭ rasijskich rublach u Rasii vydajucca pad staŭku maksimum 6,85%.
Kredyty ŭ valucie rasijanie prapanujuć Biełarusbanku pad 6,5%.
Razam z hetym, u banka niama mahčymaści kuplać valutu ŭ zachodnikaŭ — davodzicca kuplać u rasijan i pierapłočvać za pasiarednictva.
