Trybunał u Haazie abaviazaŭ ułady Biełarusi kampiensavać rasijskamu inviestaru bolš za 20 miljonaŭ dalaraŭ
Mižnarodny arbitražny trybunał u Haazie abaviazaŭ Biełaruś vypłacić amal 22,5 młn dalaraŭ rasijskamu inviestaru za eksprapryjavanuju majomaść i parušeńnie standartu spraviadlivaha abychodžańnia ŭ spravie «Manolium-Procieśsinh» suprać Biełarusi.
Heta pieršaje rašeńnie z udziełam Biełarusi ŭ inviestycyjnym arbitražy, vynik jakoha źjaviŭsia ŭ publičnym dostupie.
U 2017 hodzie rasijskaja kampanija TAA «Manolium-Procieśsinh» inicyjavała arbitražny razhlad suprać Biełarusi na padstavie Damovy ab Jeŭrazijskim ekanamičnym sajuzie. Jana patrabavała kampiensavać pramuju škodu i stračanuju vyhadu bolš za 200 młn dalaraŭ (paśla pazoŭščyk źmienšyŭ patrabavańni pryblizna da 176 młn dalaraŭ), piša Radyjo Svaboda.
Sutnaść patrabavańniaŭ zvodziłasia da taho, što ŭ 2003 hodzie kampanija zaklučyła inviestycyjnuju damovu ź Minskim harvykankamam na zabudovu ziamielnaha ŭčastku ŭ centry stalicy. U jakaści płaty za atrymańnie takoha prava da siaredziny 2011 hoda rasijanam treba było ŭźvieści niekalki kamunalnych abjektaŭ.
Adnak, jak tłumačyła situacyju Ministerstva ekanomiki, šmatlikija parušeńni z boku TAA «Manolium-Procieśsinh», vyklikanyja «niadbajnym staŭleńniem da nacyjanalnaha zakanadaŭstva», pryviali da taho, što inviestar straciŭ raniejšaje prava na budaŭnictva.
U 2014 hodzie Ekanamičny sud Minska vynies rašeńnie skasavać inviestycyjnuju damovu. Sprečki bakoŭ doŭžylisia jašče praciahły čas, choć ziamielny ŭčastak užo pieradali inšamu zabudoŭščyku. Pavodle rasijskaha boku, kamunalnyja abjekty byli ŭźviedzienyja, a dziaržorhany admovilisia vypłacić kampiensacyju vydatkaŭ.
Sioleta ŭ červieni skład arbitražu, stvorany dla razhladu hetaj spravy, pryznaŭ u adpaviednaści z Damovaj ab Jeŭrazijskim ekanamičnym sajuzie tolki zajavy pazoŭščyka, źviazanyja z rašeńniami biełaruskich sudoŭ paśla 2015 hoda i pieradačaj ziamielnaha ŭčastku ŭ rajonie płoščy Pieramohi inšamu inviestaru (ciapier tut hrupa A-100 uzvodzić žyły kompleks «Depo»).
