SK admoviŭ źmianić mieru ŭtrymańnia hałoŭnamu redaktaru «Našaj Nivy». Spatkańnia sa svajakami taksama nie dazvalajuć
Jahor Marcinovič źviartaŭsia z chadajnictvam ab źmienie miery ŭtrymańnia — pad asabistaje paručalnictva. Dva viadomyja biełaruskija navukoŭcy padali zajavy ŭ SK, harantujučy, što hatovyja paručycca za Marcinoviča. Adnak śledčy adchiliŭ chadajnictva.
Taksama rodnym Jahora Marcinoviča admaŭlajuć u spatkańni ź im. U dakumiencie adznačajecca, što pradastaŭleńnie spatkańnia z rodnymi «nie spryjaje ŭsiebakovamu, poŭnamu i abjektyŭnamu vyvučeńniu abstavin kryminalnaj spravy». Varta adznačyć, što rodnyja Jahora nie źjaŭlajucca ŭdzielnikami kryminalnaha pracesu i nie majuć nijakaha dačynieńnia da zaviedzienaj spravy.
Pajšoŭ druhi miesiac, jak Marcinoviča trymajuć u SIZA. Za hety čas ź im ni razu nie pravodzili anijakich śledčych dziejańniaŭ.
Jamu pradjaŭlena abvinavačvańnie pa č.2 art. 216 KK (naniasieńnie majomasnaj škody biez prykmiet raskradańnia). Sens pretenzijaŭ u tym, što apłata za kamunalnyja pasłuhi pamiaškańnia była pa taryfach dla fizasob, a treba było płacić pa taryfach dla jurasob. Śledčyja naličyli, što za čatyry hady pradpryjemstvu «Minenierha» byŭ naniesieny ŭron — 3,5 tysiačy rubloŭ. U «złačynny» pieryjad uvachodzić 2017-2021 hod. Varta adznačyć, što da 2019 hodu Jahor Marcinovič uvohule nie zajmaŭ kirujučych pasad. Samo pradpryjemstva z pretenzijami nikoli nie źviartałasia. Taksama abvinavačanym pa spravie prachodzić kiraŭnik adździeła rekłamy i markietynhu Andrej Skurko, z 18 lipienia jon pad vartaj, jak i Marcinovič. Našaniŭcy pryznanyja palitviaźniami.
Nahadajem, pry zatrymańni Jahor Marcinovič byŭ źbity apieratyŭnikami. Kali jaho dastavili na dopyt u SK, daviałosia vyklikać chutkuju dapamohu. Miedyki zafiksavali traŭmu hałavy. Na Akreścina našaniŭcy naŭmysna ŭtrymlivalisia ŭ niečałaviečych umovach, adnak ni prakuratura, ni minskaja milicyja, jakoj padparadkoŭvajecca izalatar časovaha ŭtrymańnia, parušeńniaŭ nie znajšli.
Čytajcie taksama:
«Nadzieli na hałavu baksiorski šlem i łupili»: pravaabaronca Andrej Pałuda raspavioŭ, jak źbivali Jahora Marcinoviča
«Pracavali tak, jak patrabavała sumleńnie, a nie instynkt samazachavańnia» Hałoŭny redaktar NN — pra tych, chto varty Nobieleŭskaj premii miru
