Ministr Kubrakoŭ adpraviŭ svajho byłoha načalnika ŭ zvańni hienierał-majora dapracoŭvać da piensii zvyčajnym vykładčykam
Hienierał-major Siarhiej Daroška z 2019 da lipienia 2021-ha ŭznačalvaŭ Akademiju milicyi. Da taho byŭ hałoŭnym u Departamiencie vykanańnia pakarańniaŭ, uznačalvaŭ minskuju milicyju. Ale z prychodam novaha ministra — Kubrakoŭ byŭ raniej padnačalenym Daroški — karjera hienierała razładziłasia.
Siarhiej Daroška na raźvitańni z kalektyvam Akademii MUS
Letam Darošku źniali z pasady načalnika Akademii. Pavodle łohiki, hienierał-majora mahli pieravieści na inšuju hienieralskuju pasadu. Ale ciapier jon dapracoŭvaje da piensii, da jakoj u takim zvańni jamu jašče piać hadoŭ, usiaho tolki vykładčykam — budzie vučyć kursantaŭ taktycy ŭnutranych vojskaŭ.
Taki pavarot losu abaznanyja źviazvajuć ź niaprostymi adnosinami z byłym padnačalenym. U 2020 hodzie i siarod vykładčykaŭ, i siarod studentaŭ byli niezadavolenyja dziejańniami siłavikoŭ pa padaŭleńni pratestaŭ z vykarystańniem katavańniaŭ.
Siarhieju Darošku sioleta spoŭnicca 50 hadoŭ, jon vypusknik fakulteta ŭnutranych vojskaŭ MUS. Pačynaŭ kamandziram u kanvojnaj bryhadzie vajskovaj častki ŭ Baranavičach, kiravaŭ korpusam achovy hramadskaha paradku ŭnutranych vojskaŭ.
Piać hadoŭ (z 2012 pa 2017) jon kiravaŭ Departamientam vykanańnia pakarańniaŭ, byŭ hałoŭnym nad usimi turmami, kałonijami, «chimijami» i ŁTP. U 2013-m hodzie atrymaŭ miedal najvyšejšaj stupieni «Za biezdakornuju słužbu». Hetamu nie pieraškodziła skandalnaja historyja sa śmierciu asudžanaha Ihara Pcičkina ŭ SIZA na Vaładarskaha, sudzili pa spravie turemnaha fieldčara.
Na čas kiravańniem Departamientam prypaŭ usplesk asudžanych za raspaŭsiud narkotykaŭ, pieravažna maładych ludziej. Ich baćki hadami abivali parohi MUS, kab dabicca palapšeńnia ŭmovaŭ. Łukašenka tady zahadvaŭ stvaryć dla asudžanych za narkotyki nievynosnyja ŭmovy, kab jany prasili śmierci. U kałonijach byli stvoranyja admysłovyja atrady dla «narkamanaŭ», na ich stali viešać admietnyja kalarovyja birki, na parušeńnie pravoŭ źviartali ŭvahu i biełaruskija, i mižnarodnyja pravabaaroncy. Ciapier šmat u čym takoje staŭleńnie pierakinułasia na asudžanych za palityčnuju pazicyju.
Nastupnaj prystupkaj pa karjernaj leśvicy dla Daroški stała minskaja milicyja, jakuju jon uznačalvaŭ z 2017 pa 2019 hod. Łukašenka, pryznačajučy jaho načalnikam, zajaviŭ:
«Dobraja praktyka, kali vychodziać našy chłopcy z vajskovaj čaści, amapaŭcy, iduć, dziažurać try chłopcy — krasaŭcy. Heta demanstracyja nasielnictvu, što ŭ nas paradak. I vajskoŭcam treba hetamu vučycca, kali jany patrulujuć horad. Jany buduć razumieć, što patrebnyja ludziam, a ludzi, hledziačy na ich, buduć razumieć, što ŭ horadzie spakojna».
Na kiravańnie Daroški vypali «Maršy nietuniejadcaŭ», brutalnyja zatrymańni i źbićcio ludziej na Dzień voli.
Praz 16 miesiacaŭ Siarhiej Daroška źmianiŭ kresła — staŭ kiravać Akademijaj milicyi. U 2020 hodzie, paśla brutalnych razhonaŭ i źbićcia demanstrantaŭ, niekatoryja vykładčyki syšli z Akademii, krytykavali siłavikoŭ, pytańni zadavali i kursanty: ich zaŭsiody pryciahvali da achovy hramadskaha paradku na masavych akcyjach pratestu.
Sioleta ŭ Akademiju MUS čakaŭsia niedabor na dźviuch śpiecyjalnaściach na fakultecie milicyi — «administratyŭna-pravavaja dziejnaść» i toj ža kirunak u intaresach Minabarony. Pastupić na biudžet na jurysta moh navat troješnik, jaki nabraŭ 135 bałaŭ (suma bałaŭ za try CT i siaredni bał atestata).
