Chto taki Michaił Huceryjeŭ i čym jamu adhuknucca brytanskija sankcyi?
Siońnia Vielikabrytanija dałučyłasia da sankcyjnaj palityki ES i zaćvierdziła abnoŭleny śpis sankcyj suprać biełaruskaha režymu, kudy trapiŭ rasijski aliharch Michaił Huceryjeŭ. Raskazvajem, jak jon źviazany ź Biełaruśsiu i čym adhuknucca sankcyi.
Huceryjeŭ źjaviŭsia ŭ Biełarusi ŭ 2000-ch, kali biednaj postsavieckaj krainie treba było znajści, jak efiektyŭniej vykarystoŭvać patencyjał naftapierapracoŭki.
Sumiesnaje biełaruska-rasijskaje pradpryjemstva «Słavnafta», jakomu naležała pałova akcyj Mazyrskaha NPZ, uznačaliŭ Huceryjeŭ. Pry im adbyłasia madernizacyja MNPZ, što vielmi acaniŭ Łukašenka.
U nastupnym Huceryjeŭ raźvivaŭ ułasnuju naftavuju kampaniju «RussNafta», ale sutyknuŭsia z kryminalnym pieraśledam u Rasii, pradaŭ svaje aktyvy Alehu Dzierypasku i praź Minsk uciok u Brytaniju.
U 2010-m jon viarnuŭsia ŭ Rasiju, viarnuŭ sabie kampaniju i biznes raskvitnieŭ z novaj siłaj, roŭna jak i adnosiny z susiedniaj Biełaruśsiu.
Pamiatajučy mieniedžarskija zdolnaści Michaiła, Łukašenka prapanoŭvaŭ jamu ŭdzielničać u pryvatyzacyi Biełaruśkalija, ale ŭ vyniku ŭsio pierajhrałasia i vyjšła inačaj — u 2011-m dziaržaŭnyja ŚMI rapartavali, što «rasijski miljarder układzie ŭ ekanomiku respubliki paŭtara miljarda dołaraŭ dla raspracoŭki Niežynskaha radovišča kaliju pad Lubańniu».
Voś tolki ŭ realnaści Huceryjeŭ uziaŭ u kitajcaŭ kredyt na 1,4 miljardy dołaraŭ na budaŭnictva horna-ŭzbahačalnaha kambinata pad harantyi Saŭmina. U suchim astatku doŭh brała Biełaruś, a zarablać budzie Huceryjeŭ.
Svaich hrošaj pa roznych acenkach jon ukłaŭ ad 250 da 600 miljonaŭ dalaraŭ. Huceryjeva źviazvajuć sa źjaŭleńniem u Łukašenki Majbacha i viertalota. Jon ža źviazany z IT-biznesmienam Viktaram Prakapieniem, kažuć, Huceryjeŭ dapamoh jamu vyjści na svabodu ź SIZA.
Taksama Huceryjeŭ budavaŭ u Minsku hatel «Reniesans» i novy terminał u aeraporcie.
Ale ciapier realnaść u tym, što abiacany horad-sad u Lubani pahražaje vyjavicca kredytnaj kabałoj dla biełarusaŭ jašče i pierad kitajcami, bo niezrazumieła, jak Huceryjeŭ źbirajecca addavać harantavanyja biełaruskaj dziaržavaj amal 1,5 miljardy dalaraŭ kitajcam va ŭmovach, kali jaho ŭłasnyja mahčymaści dziejničać ściskajucca sankcyjami, a siektaralnaja zabarona ekspartu pahražaje abvalić pastaŭki «Słaŭkalija».
Jak dobra ciapier iduć spravy ŭ Huceryjeva, dakładna nieviadoma: u suviazi z sankcyjami ES jamu davodzicca vykručvacca i pierapisvać biznesy. Tak, aliharch byŭ vymušany pakinuć radu dyrektaraŭ kampanii «Rusnafta».
Krynicy «Našaj Nivy» ź biznes-kołaŭ ličać, što brytanskija i jeŭrapiejskija sankcyi nanosiać udar nie pa jaho biahučych spravach, a pa budučyni Huceryjeva — usio ž taki ŭ jaho niama vialikich kampanij na mižnarodnych biržach, jakija možna było b zhubić.
«Asnoŭny jaho biznes — strachavańnie, nafta, deviełapierstva, kalij — jano za miežami ES i Brytanii. Heta ŭsio ŭnutry Rasii i Biełarusi, kredytujecca pieradusim jon taksama ŭ rasijskich dziaržaŭnych bankach. Ale vidavočna, svajoj brytanskaj majomaściu na niekalki dziasiatkaŭ miljonaŭ funtaŭ jon užo nie skarystajecca, hrošy na Zachad nie vyviedzie, nie kažučy pra toje, što ciapier dla partnioraŭ stanovicca vielmi taksičnym i jahony syn Said Huceryjeŭ, jaki žyvie i viadzie spravy ŭ Łondanie», — ličać u biznes-kołach.
