U Minskaj vobłaści šukajuć rabotnikaŭ na zarobak bolš za $11 tysiač. Praca ŭ lesie, prapanova ad arabskaha biznesu
U ahulnarespublikanskim banku vakansij amal 98 tysiač prapanoŭ, u 90% vypadkaŭ zarobki nie pieravyšajuć 1000 rubloŭ. Adnak byvajuć i niečakanyja vakansii. Tak, u Minskaj vobłaści šukajuć mieniedžaraŭ, jakim hatovyja płacić bolš za 11 tysiač dalaraŭ. Što treba rabić za takija hrošy?
Fota: Jaŭhien Jerčak, TUT.BY
Vakansija naležyć kampanii «KPI Śpiešył Prodžekts», jakaja, kažuć, źviazana z kapitałam AAE i atrymała ŭčastak dla palavańnia ŭ Łahojskim rajonie.
U 2013 hodzie Łukašenka svaim ukazam z hryfam «dla słužbovaha karystańnia» daŭ u arendu na 99 hadoŭ učastki ziamli ŭ Łahojskim i Smalavickim rajonie. Kataru dastałasia kala 25 kvadratnych kiłamietraŭ lasoŭ na 99 hadoŭ. U 2014 hodzie 32 kvadratnyja kiłamietry atrymali pradstaŭniki Abjadnanych arabskich emirataŭ, ich ściahi łunajuć u Łahojskim rajonie. Što ad hetaha maje Biełaruś? Jak paviedamlaŭ TUT.BY, arendnaja płata ŭ pierśpiektyvie pavinna skłaści kala $300 tysiač za hod, ale ŭ pieršyja hady suma našmat mienšaja.
Kampanija «KPI Śpiešył Prodžekts» šukaje dvuch mieniedžaraŭ na 29 600 rubloŭ sa śpiecyfičnymi ŭmieńniami. Akramia vyšejšaj adukacyi i anhlijskaj movy na prasunutym uzroŭni, treba taksama mieć dośvied pracy na kiraŭničych pasadach u śfiery lasnoj i palaŭničaj haspadarki, a taksama na kirujučych pasadach sa štatam padnačalenych nie mienš za 10 čałaviek. U dadatak pavinien być piacihadovy dośvied jehiera i dośvied dresiroŭki i ŭzajemadziejańnia z žyviołami. I pažadana, kab byŭ taksama dośvied atrymańnia dazvołu na ŭvoz i vyvaz žyvioł.
Fota: Jaŭhien Jerčak, TUT.BY
Taki śpiecyjalist pavinien umieć ekspłuatavać i absłuhoŭvać ciažkuju techniku: hrejdary, traktary, ekskavatary, frantalnyja pahruzčyki i hetak dalej. Višańka na torcie: akramia ŭsiaho vyšejpieraličanaha śpiecyjalist pavinien umieć raspracoŭvać stratehii raźvićcia sacyjalnych sietak, vałodać instrumientami internet-prasoŭvańnia i tarhietavanaj rekłamy.
A što astatnim?
Z amal 98 tysiač vakansij amal pa 89 tysiačam prapanujuć zarobak da 1000 rubloŭ brudnymi. To bok paśla spłaty abaviazkovych płaciažoŭ rabotnik atrymaje 860 rubloŭ — prykładna $338, kali brać ciapierašni kurs.
Adnak tysiača rubloŭ — heta jašče vydatny zarobak, bo pa 47 tysiačam vakansij pracadaŭcy abiacajuć płacić nie bolš za 700 rubloŭ. U takim vypadku na ruki rabotniki atrymajuć 602 rubli abo $239.
Jašče pa 8736 vakansij prapanoŭvajuć zarpłaty nie bolš za 400 rubloŭ, to bok minimalnyja. Praŭda, pa mnohich ź ich prapanoŭvajecca praca na niapoŭny dzień.
Vyšej za 1000 rubloŭ brudnymi pracadaŭcy hatovyja płacić pa 8 841 vakansii. Pry hetym u 8495 vypadkach prapanoŭvajuć ad tysiačy da dźviuch.
Bolš za 2000 rubloŭ hatovyja płacić tolki ŭ 343 vypadkach.
