Zialenski daručyŭ SBU i MUS vyvučyć ryzyki dla biełarusaŭ va Ukrainie paśla śmierci Šyšova
Prezident Ukrainy daručyŭ Słužbie biaśpieki i Ministerstvu ŭnutranych spravaŭ vyvučyć usie ryzyki dla biełarusaŭ, jakija prybyli va Ukrainu na praciahu apošniaha hoda. Takoje daručeńnie jon daŭ paśla śmierci kiraŭnika «Biełaruskaha doma va Ukrainie» Vitala Šyšova, piša RBK-Ukraina.
Pavodle jaho słoŭ, kožny biełarus, jaki moža stać metaj dla złačyncaŭ u suviazi sa svajoj publičnaj palityčnaj pazicyjaj, pavinien atrymać śpiecyjalnuju i nadziejnuju abaronu.
«SBU i MUS pavinny adpracavać dakładny ałharytm acenki mahčymych ryzyk, a taksama sumu adkazaŭ na hetyja ryzyki, kab likvidavać lubuju pahrozu dla ludziej», — adznačyŭ Zialenski.
U Ofisie prezidenta paviedamili, što vyznačany pieralik hramadzian Biełarusi, u dačynieńni da jakich užo pačali ažyćciaŭlać adpaviednyja miery pa acency ryzyk, dadatkovym supravadžeńni ich znachodžańnia na terytoryi Ukrainy i pa achovie.
«Heta rašeńnie pryniata ŭ suviazi z atrymańniem pravaachoŭnymi orhanami infarmacyi ab mahčymych pahrozach dla šerahu biełaruskich aktyvistaŭ, a taksama z-za trahičnaj hibieli Vitala Šyšova», — havorycca ŭ paviedamleńni.
