«Ja z žančynami nie vajuju». U Biełarusi bolš za 80 žančyn-palitviaźniaŭ
Alaksandr Łukašenka ŭčora raskazaŭ svaju viersiju padziej ab adjeździe Śviatłany Cichanoŭskaj u Litvu ŭ žniŭni 2020 hoda. Łukašenka niekalki razoŭ zajaviŭ, što z žančynami nie vajuje — i niekalki razoŭ vykarystaŭ u dačynieńni da Cichanoŭskaj abraźlivyja słovy. Na siońnia ŭ Biełarusi bolš za 80 palitviaźniaŭ žančyn.
Kaciaryna Andrejeva i Darja Čulcova. Fota Nadziei Bužan
Siarod ich Maryja Kaleśnikava, Maryna Zołatava, Volha Załatar, Julija Słuckaja, Valeryja Kaściuhova, Sofja Małaševič, Kaciaryna Andrejeva i Darja Čulcova, a taksama dziasiatki inšych žančyn, zatrymanych pa palityčnych matyvach.
Maryja Kaleśnikava
Maryja była vykradzienaja 7 vieraśnia ŭ Minsku i razam ź jašče dźviuma siabrami Kaardynacyjnaj rady, Antonam Radnienkovym i Ivanam Kraŭcovym, hvałtoŭna pryviezienaja na biełaruska-ŭkrainskuju miažu dla vydvareńnia z krainy. Adnak parvaŭšy svoj pašpart na pamiežnym pierachodzie i vyskačyŭšy z aŭtamabila, Maryja Kaleśnikava pieraškodziła realizacii śpiecapieracyi siłavikoŭ.
9 vieraśnia stała viadoma, što žančyna zatrymanaja i padazrajecca ŭ kryminalnym złačynstvie pa č. 3 art. 361 Kryminalnaha kodeksa (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś).
12 vieraśnia stała viadoma, što Maryju Kaleśnikavu pierieviali ŭ SIZA h. Žodzina.
21 śniežnia stała viadoma, što pa paručeńni Hienprakuratury Śledčy kamitet raspačaŭ kryminalnuju spravu ab zmovie z metaj zachopu ŭłady niekanstytucyjnym šlacham (častka 1 artykuła 357 KK) suprać členaŭ Kaardynacyjnaha savieta. Taksama Maryja Kaleśnikava stała fihurantkaj kryminalnaj spravy ab stvareńni ekstremisckaha farmiravańnia (artykuł 361-1 KK), taksama ŭzbudžanaj suprać Kaardynacyjnaj rady.
Nočču 8 studzienia Maryju pieraviali ŭ SIZA-1 u Minsk.
11 lutaha stała viadoma, što Maksimu Znaku i Maryi Kaleśnikavaj vystavili novyja abvinavačvańni: zmova z metaj zachopu dziaržaŭnaj ułady niekanstytucyjnym šlacham (č. 1 art. 357 KK), stvareńnie ekstremisckaha farmiravańnia i kiraŭnictvie im (č. 1 art. 361-1 KK).
Maryna Zołatava
Na Tut.by Maryna Zołatava pryjšła ŭ 2004 hodzie, a nieŭzabavie stała jaho hałoŭnaj redaktarkaj. Zołatava lubić bałkanskuju kulturu, viedaje bałharskuju movu. Volny čas Zołatava pryśviačaje prasłuchoŭvańniu bałkanskaj muzyki.
Maryna była zatrymanaja 18 traŭnia ŭ ramkach kryminalnaj spravy, raspačataj suprać TUT.BY za ŭchileńnie ad vypłaty padatkaŭ u asabliva bujnym pamiery (č. 2 art. 243 Kryminalnaha kodeksa).
Volha Załatar
29 sakavika Volzie vystavili abvinavačvańnie — «stvareńnie ekstremisckaha farmiravańnia albo kiraŭnictva takim farmiravańniem abo ŭvachodziačym u jaho strukturnym padraździaleńniem» (artykuł 361-1 KK).
31 sakavika sud Partyzanskaha rajona adchiliŭ skarhu advakata Volhi na pastanovu ab užyvańni miery strymańnia ŭ vyhladzie zaklučeńnia pad vartu.
7 lipienia — u dzień narodzinaŭ — Volhu Załatar pieraviali na dva tydni ŭ RNPC psichičnaha zdaroŭja dla praviadzieńnia psichijatryčnaj ekśpiertyzy.
Julija Słuckaja
Julija była zatrymana rankam 22 śniežnia ŭ aeraporcie pa viartańni ŭ Biełaruś finansavaj milicyj. Adtul jaje pavieźli na ahlad kvatery. Byli vyniaty telefon, noŭtbuk i kartki. Paśla jaje advieźli na dopyt u DFR.
Słuckuju źmiaścili ŭ IČU na Akreścina, a zatym pieraviali ŭ SIZA-1 na vuł. Vaładarskaha, dzie jana ciapier i znachodzicca.
31 śniežnia stała viadoma, što Julii Słuckaj vystavili abvinavačvańnie pa č. 2 artykuła 243 Kryminalnaha kodeksa — uchileńnie ad vypłaty sum padatkaŭ, zboraŭ u asabliva bujnym pamiery.
Valeryja Kaściuhova
Valeryja Barysaŭna Kaściuhava — palitołah, analityk, zasnavalnica i redaktarka sajta ekśpiertnaj supolnaści «Naša mierkavańnie», redaktarka i aŭtar «Biełaruskaha štohodnika» i kiraŭnica hrupy ekśpiertaŭ pa manitorynhu «Biełaruś u fokusie».
Valeryja była zatrymana 30 červienia 2021 hoda paśla vobšuku ŭ svaim domie. Vobšuk pravodzili supracoŭniki KDB. Jaje pamiaścili ź izalatar časovaha ŭtrymańnia, adtul pieraviali ŭ SIZA №1 na Vaładarskaha.
Sofja Małaševič
Safija Małaševič u pieršy raz była zatrymana 6 vieraśnia na akcyi pratestu «Marš adzinstva», padčas jakoj jana bałončykam z farbaj malavała na pavierchni ščytoŭ śpiecyjalnych srodkaŭ zaharodžy. Jana stała padazravanaj pa kryminalnaj spravie pa art. 342 KK (udzieł u hrupavych dziejańniach, hruba parušajučych hramadski paradak) i č. 2 art. 339 KK (chulihanstva, ździejśnienaje hrupaj asobaŭ).
Tady jaje adpuścili pad padpisku ab niavyjeździe, ale znoŭ zatrymali 30 listapada i źmiaścili pad vartu.
Utrymlivajecca ŭ SIZA ŭ Žodzinie.
Taksama stała viadoma, što Safiju vinavaciać u abrazie prezidenta (art. 368 KK RB).
Padčas suda abvinavačańnie taksama pierakvalifikavała č. 2 art. 339, zhodna ź jakoj abvinavačvali Safiju Małaševič, na č. 1 art. 339. Šlacham składańnia pakarańniaŭ pa troch artykułach (č. 1 art. 368, č. 1 art. 342, č. 1 art. 339) jaje pakarali dvuma hadami pazbaŭleńnia voli ŭ kałonii ahulnaha režymu.
Kaciaryna Andrejeva
Razam z žurnalistkaj Darjaj Čulcovaj stała fihurantkami kryminalnaj spravy ab arhanizacyi dziejańniaŭ, jakija hruba parušajuć hramadski paradak (art. 342 Kryminalnaha kodeksa), paśla pramoha efiru ź miesca žorstkaha razhonu siłavikami demanstrantaŭ na «płoščy pieramienaŭ» u Minsku 15 listapada.
Paśla siami sutak administracyjnaha aryštu jana nie vyjšła na volu. Kaciarynu pieraviali ŭ izalatar u Žodzinie.
18 lutaha asudžanaja na dva hady pazbaŭleńnia voli z nakiravańniem u papraŭčuju kałoniju ahulnaha režymu.
Darja Čulcova
Razam z žurnalistkaj Kaciarynaj Andrejevaj stała fihurantkami kryminalnaj spravy ab arhanizacyi dziejańniaŭ, jakija hruba parušajuć hramadski paradak (art. 342 KK), paśla pramoha efiru ź miesca žorstkaha razhonu siłavikami demanstrantaŭ na «płoščy pieramienaŭ» u Minsku 15 listapada.
Paśla administracyjnaha aryštu jana nie vyjšła na volu, joj vystavili abvinavačvańnie.
18 lutaha asudžanaja na dva hady pazbaŭleńnia voli z nakiravańniem u papraŭčuju kałoniju ahulnaha režymu.
