Žychara Hankonha aryštavali za toje, što aśvistaŭ himn Kitaja padčas prahladu Alimpijskich hulniaŭ
Palicyja Hankonha aryštavała mužčynu pa padazreńni ŭ źniavazie nacyjanalnaha himna paśla taho, jak jon aśvistaŭ kitajski himn padčas prahladu alimpijskich spabornictvaŭ u handlovym centry, piša Guardian.
Ilustracyjny zdymak. Fota Depositphotos.com
40-hadovy mužčyna byŭ zatrymany ŭ piatnicu paśla taho, jak razmachvaŭ ściahami Hankonha brytanskaj kałanijalnaj epochi i aśvistvaŭ himn, zaklikajučy inšych dałučycca da jaho.
Mužčyna stajaŭ u natoŭpie razam ź inšymi, kab panazirać za hankonhskim fiechtavalščykam u finale. Aśvistvańnie pačałosia na cyrymonii ŭznaharodžańnia, kali zajhraŭ nacyjanalny himn.
U červieni 2020 hoda Hankonh pryniaŭ zakon, jaki praduhledžvaje kryminalnuju adkaznaść za lubyja dziejańni, jakija źnievažajuć dziaržaŭny himn. Parušeńnie zakona moža pahražać štrafam da 6400 dalaraŭ ZŠA i da dzieviaci hadoŭ turemnaha źniavoleńnia.
Centralny ŭrad Kitaja ŭvioŭ kryminalnuju adkaznaść za dziejańni, jakija źnievažajuć nacyjanalny ściah i hierb, u papraŭkach, uniesienych u zakon u kastryčniku 2020 hoda. Zakon taksama ŭžyvajecca i ŭ Hankonhu, jaki maje asablivy status u Kitai i ŭłasnuju zakanadaŭčuju sistemu.
