Vunderkind i hiej, jakoha ckavali ŭ škole, a paśla palubili miljony. Historyja pośpiechu alimpijca z Brytanii
Tom Dejli — sapraŭdnaja zorka ŭ Brytanii. Jaho YouTube-kanał maje amal miljon padpisčykaŭ. Spartoviec, jaki nadzvyčaj udała skača ŭ vadu — uładalnik troch miedaloŭ, u tym liku zołata ŭ Tokia. Na pieršuju Alimpijadu pajechaŭ, kali jamu było 14 hadoŭ. A kali viarnuŭsia, jaho pačali ckavać u kaledžy. Raskazvajem historyju pośpiechu Toma.
Tom Dejli. 2012 hod
Ckavańnie ŭ kaledžy
Dla Toma sioletnija hulni — užo čaćviortyja pa liku. Pieršy raz 14-hadovy Dejli ŭdzielničaŭ u alimpijadzie ŭ Piekinie, adkul, praŭda, viarnuŭsia bieź miedala. Ale jon staŭ viadomym, što nie spadabałasia adnahodkam.
Toma nazyvali «chłopčykam-dajvieram» i «chłopčykam-śpidomietram», kidali ŭ jaho rečy. Pryčym, małodšyja dzieci brali prykład sa starejšych.
Dejli zamknuŭsia. Baćka nie adpuskaŭ jaho ŭ kaledž pierad bujnymi spabornictvami, chadziŭ da dyrektara. Ale taja zajaviła, što ničoha nie viedała. Paźniej pryznałasia, što niekarektnyja pavodziny dazvalali sabie tolki asobnyja studenty.
Kab zachavać psichiku syna, baćka pieravioŭ Toma ŭ inšy kaledž, dzie ŭsio naładziłasia. Ispyty Dejli zdavaŭ u paŭzie pamiž vystupleńniami. Jon śpiecyjalizavaŭsia na ispanskaj movie (atrymaŭ «vydatna»), matematycy i fatahrafii (adznaka «dobra»).
Vunderkind i miedyja-zorka
Tom Dejli. 2008 hod
Vialikabrytanija — adna z samych paśpiachovych kamandaŭ u historyi Alimpijskich hulniaŭ. Za ŭsie časy jana ŭsiaho dva razy nie traplała ŭ top-15 pa kolkaści miedaloŭ.
Apošnija hulni — sucelny tryumf Vialikabrytanii. Piekin-2008 — čaćviortaje miesca, Łondan-2012 — treciaje, Rya-2016 — druhoje. Pieramožcaŭ bieźlič. Čamu ž Tom vyłučajecca na ich fonie?
Jon sapraŭdny vunderkind. Pačaŭ zajmacca skokami ŭ vadu ŭ siem hadoŭ.
Kali Tomu było 10, jon vyjhraŭ spabornictvy siarod junijoraŭ va ŭzrostavaj hrupie da 18 hadoŭ. U nastupnym hodzie chłopcu spoŭniłasia 11. Jaho zaprasili ŭ jakaści hościa na čempijanat Aŭstralii, dzie jon uziaŭ zołata i srebra ŭ baraćbie z chłopcami, starejšymi za jaho na niekalki hadoŭ.
Anhličanin nadzvyčaj stabilny. Jon źbiraje ŭznaharody na čempijanatach śvietu i Jeŭropy z kanca nulavych. I mienavita Tom ciahnie za saboj partnioraŭ. U Toma ŭ skarboncy try alimpijskija miedali.
U Łondanie-2012 jon uziaŭ bronzu ŭ indyvidualnych skokach z 10-miatrovaj vyški. U Rya-2016 — jašče adnu bronzu. Ale ŭžo ŭ sinchronnych skokach z toj ža vyšyni. U Tokia jon znoŭ uziaŭ zołata ŭ apošniaj naminacyi.
U sinchronnych skokach Dejli ŭžo niekalki razoŭ mianiaŭ partnioraŭ. I kožny raz zastavaŭsia na pjedestale.
Tom Dejli ŭ 2012 hodzie
Istotna, što Tom kanviertuje svaje pośpiechi ŭ miedyjnuju viadomaść. Kali jamu spoŭniłasia 18, BBC užo naminavaŭ jaho jak «maładoha spartyŭnaha piersanaža hoda». U 2012-m jaho papularnaść ledź nie syhrała ź im drenny žart.
U finale jaho aślapiła vielizarnaja kolkaść uspyšak ad fotaaparataŭ, tamu refiery dazvoliŭ jamu skoknuć jašče raz.
Ale heta jašče nie ŭsio. U 2013-m Dejli pajšoŭ na telebačańnie. Na telekanale ITV było pakazana šou «Splash!». Na im brytanskija znakamitaści — ad piśmieńnika da dyzajniera interjeraŭ — imknulisia avałodać majsterstvam dajvinha.
Šou raskrytykavali, ale ŭ niejki momant jaho adnačasova hladzieli 5,9 miljonaŭ čałaviek.
Dejli, jaki źjaŭlaŭsia trenieram znakamitaściaŭ, staŭ jašče bolš viadomym. Šou chutka zakryłasia, ale, mahčyma, heta tolki paspryjała karjery spartsmiena: jon moh kancentravacca vyklučna na sporcie.
Muž, starejšy na 20 hadoŭ
Daścin Łens Błejk
Naprykancy 2013 hoda Tom pierajechaŭ z rodnaha Plimuta ŭ Łondan. Za dva hady da hetaha pamior jahony baćka, jamu było ŭsiaho 40, u jaho była puchlina hałaŭnoha mozha.
Pierajezd supaŭ z kamin-aŭtam: Dejli pryznaŭsia, što sustrakajecca z chłopcam.
«Viadoma, mnie ŭsio jašče padabajucca dziaŭčyny, ale zaraz ja sustrakajusia z chłopcam, i ja vielmi ščaślivy», —
skazaŭ jon na svaim YouTube-kanale.
Dejli staŭ adnym ź pieršych brytanskich alimpijcaŭ, jaki ździejśniŭ kamin-aŭt. Jaho padtrymali šmat sielebryci — ad asabistaha treniera da słavutaha futbalista Hary Linikiora, ale nie ŭsie rodnyja pastavilisia da takoha vykazvańnia adznaznačna. Paźniej Tom zajaviŭ, što ličyć siabie hiejam.
Abrancam spartsmiena staŭ viadomy amierykanski scenaryst, režysior i pradziusar Daścin Łens Błejk, starejšy za Toma na 20 hadoŭ. Jany sustrelisia na adnoj ź imprezaŭ, i, jak paźniej pryznavaŭsia Tom, heta było kachańnie ź pieršaha pozirku.
Najbolš Błejk viadomy jak aŭtar scenaryja da filma «Charvi Miłk», jaki raskazvaje pra adnajmiennaha palityka. Miłk — pieršy adkryty hiej, jaki zajmaŭ dziaržaŭny post u štacie Kalifornija (jaho vybrali členam haradskoha naziralnaha savieta San-Francyska), ale byŭ zabity.
Stužka sabrała siem naminacyj na «Oskar» i pieramahła ŭ dźviuch: tryumf u naminacyi «lepšaja mužčynskaja rola» śviatkavaŭ Šon Pen, a Błejka adznačyli jak «lepšaha scenarysta».
Dejli i Błejk uziali šlub i dahetul razam. Jany vychoŭvajuć syna, jaki naradziŭsia pry dapamozie surahatnaj maci.
