«Makieju čas źbirać čamadany i rychtavacca da poŭnaha zabyćcia» — Astapienka
Narada Alaksandra Łukašenki z dypłamatami prajšła vielmi niespakojna. Pradstaŭnikoŭ dypkorpusa sprabavali zapałochać, kab bolej nie było tych, chto pojdzie suprać ułady. Łukašenka i Makiej faktyčna ŭ adkrytuju kazali, što Zachad moža atrymać novuju «haračuju kropku» ŭ Biełarusi, a taksama zastrašvali susiednija dziaržavy tym, što na ich miežach mohuć źjavicca biežancy sa zbrojaj. «Naša Niva» abmierkavała sustreču z pradstaŭnikom NAU, byłym pasłom Biełarusi na Kubie i Arhiencinie Uładzimiram Astapienkam.
«Naša Niva»: Jakija ŭražańni ŭ vas pakinuła narada Łukašenki z vašymi byłymi kalehami?
Uładzimir Astapienka: Makiej adznačyŭ: «Toje, što adbyvajecca ŭ Biełarusi, nie ŭpisvajecca ŭ ramki ahulnačałaviečaha razumieńnia». Heta adzinaje, z čym ja hatovy pahadzicca. Usio astatniaje, što ahučvałasia i Makiejem, i Łukašenkam — heta sucelnaje zalustroŭje. Tut treba albo stavić dyjahnaz, albo prosta razvodzić rukami.
Ich dziejańni całkam źniavažajuć humannyja kaštoŭnaści, tamu što paśla vybaraŭ režym kančatkova straciŭ čałaviečy tvar. Naprošvajecca anałohija z partuhalskim dyktataram Sałazaram, jakomu ŭ staraści drukavali hazietu ŭ adzinym ekziemplary.
Vidavočna, što i biełaruski režym robić niešta padobnaje — stvaraje ŭłasnuju karcinku i ihnaruje ŭsio, što adbyvajecca ŭ śviecie realnym. Jany robiać vyhlad, što ździŭlajucca sankcyjam, ale pry hetym zabyvajucca, što paśla vybaraŭ i mirnych akcyjaŭ źjavilisia dziasiatki tysiač paciarpiełych, jość zabityja, tysiačy asudžanych, byŭ zachopleny samalot Raynair, była spravakavanaja nielehalnaja mihracyja…
Adsiul i taki pahroźlivy ton u razmovie z dypłamatami, bo Łukašenka bajaŭsia i baicca, što hetaja sistema rassyplecca, što ŭ ludziej chopić sumleńnia ustać i «pakłaści partbilet na stoł». Jon ich pałochaje rearhanizacyjaj, skaračeńniami, adklikańniami, kankretnymi prykładami represavanych dypłamataŭ. Jon nastojvaje na tym, kab hetyja ludzi nie prosta padpisalisia pad usimi jahonymi dziejańniami, ale i aktyŭna ich abaraniali, stali jaho tvaram.
U dziejnych dypłamataŭ jość dva varyjanty: albo apranuć masku Łukašenki, albo pasprabavać zachavać čałaviečy tvar, ale apošni varyjant užo niesumiaščalny z pracaj na dypłamatyčnaj pasadzie.
«NN»: My pačuli, što dypłamat musić bić mordu tym, chto źniaŭ dziaržaŭny ściah. Heta takaja novaja stratehija biełaruskaj dypłamatyi?
UA: Tak, heta novaje staŭleńnie režymu da dypłamatyi ŭ sučasnych umovach palityčnaj izalacyi — bić mordy i zmahacca za kožny traktar. Ciapier u padrychtoŭku dypłamataŭ zamiest kursaŭ pa pravach čałavieka treba budzie ŭvodzić siekcyi boksu i karate. Biełaruskaj dypłamatyi ŭžo nie zastajecca, jana straciła šmatviektarnaść, pavahu i aŭtarytet i nie moža stvaryć efiektyŭnuju źniešniuju paviestku.
«NN»: Ci pačuli vy niejkija namioki na dyjałoh z Zachadam padčas usich hetych razmovaŭ?
UA: Absalutna nie. Heta pa-raniejšamu poza strausa z hałavoj u piasku, jaki ničoha nie bačyć i nie čuje. Ale adnačasova režym užyvaje vielmi ahresiŭnuju rytoryku, jakaja padvodzić da tezisu ab źjaŭleńni novaj «haračaj kropki» na karcie Jeŭropy, jašče horšaj, čym va Ukrainie, dzie zahinuli dziasiatki tysiač čałaviek. Takuju pierśpiektyvu rychtujuć našaj krainie. Ale ja nie ŭjaŭlaju, z kim jany źbirajucca vajavać? Ź biełaruskim narodam? Naŭrad ci abvieściać vajnu NATO ci Rasii.
«NN»: U čym ciapier funkcyja Makieja, kali zamiežnych spraŭ faktyčna nie zastałosia?
UA: Kali słuchać pasažy Łukašenki, to Makieju čas źbirać čamadany i rychtavacca ci da niehanarovaj staraści, ci da poŭnaha zabyćcia. Naŭrad ci jamu doŭha atrymajecca ŭsiadzieć na hetaj pasadzie. Jahonyja sproby pakazać siabie ŭ pryvabnym śviecie ŭ vačach Łukašenki nakanavanyja na pravał.
