Moh nazyvacca «Novaja Jeŭropa». Čamu ŭźnik «Słavianski Bazar» i ci kuplajuć na jaho kvitki
Siońnia ŭ Viciebsku pačynajecca ŭžo tryccaty pa liku «Słavianski bazar». «Naša Niva» zhadała pieršy forum, što prajšoŭ u 1992 hodzie i vyśvietliła, kali skłałasia kancepcyja fiestyvalu.
Čamu «Słavianski bazar» źjaviŭsia mienavita ŭ Viciebsku? Hety horad źjaŭlaŭsia pabracimam polskaj Zielenaj Hury, dzie ź siaredziny 1960-ch pravodzilisia fiestyvali savieckaj pieśni. Padčas pierabudovy ŭ adkaz źjaviŭsia «Fiestyval polskaj pieśni», jaki prajšoŭ dvojčy, u 1988 i 1990 hodzie. Mienavita dla pieršaha foruma pabudavali Letni amfiteatr, na jakim ładziacca asnoŭnyja kancerty «Bazaru».
U 1992-m musiŭ adbycca treci fiestyval. Ale raspad SSSR prymusiŭ źmianić kancepcyju. Ministerstva kultury pačało raspracoŭku prajekta pad nazvaj «Novaja Jeŭropa». Ale hrošy na jaho nie znajšlisia.
U vyniku čynoŭniki vyrašyli pravieści bolš tradycyjny pa prahramie forum. «[Praviadzieńnie «Bazaru»] tłumačyłasia adnym: lubym srodkam padtrymać tradycyju viciebskich mižnarodnych fiestyvalaŭ», — pisaŭ tady časopis «Mastactva».
Nazva źjaviłasia nie biez udziełu pieršaha dyrektara «Bazaru» Radyjona Basa. Kancepcyju novaha foruma jon abmiarkoŭvaŭ ź siabrami ŭ Maskvie niedaloka ad restarana «Słavianski bazar».
Pierad forumam Bas pryznaŭsia, što biudžet składaŭ kala 154 tysiač dalaraŭ. Suzasnavalnikami stali pryvatnyja niekamiercyjnyja arhanizacyi Biełarusi, Rasii i Ukrainy. Adnym ź ich byŭ Sajuz «ŹNIČ», jaki ŭznačalvała Natalla Mašerava, dačka kolišniaha lidara BSSR.
Chto vyjšaŭ na scenu pieršaha «Bazaru»? Jašče da aficyjnaha adkryćcia na scenie adbyŭsia kancert Valeryja Lavoncjeva. Taksama ŭ Viciebsk pryjechali Łarysa Dolina, Leŭ Leščanka, Nadzieja Babkina, Jarasłaŭ Jeŭdakimaŭ, Viačasłaŭ Dabrynin, Alaksandra Pachmutava, hrupa «Na-na», Saso Paŭliašvili, Iryna Panaroŭskaja, ź biełarusaŭ vystupali «Pieśniary», «Vierasy», «Siabry» i navat Alaksandr Saładucha.
Terminy praviadzieńnia «Słavianskaha bazaru» supali ź fiestyvalem biełaruskaj pieśni «Basovišča» ŭ Biełastoku i mižnarodnym fiestyvalem u Jurmale. Mienavita tudy i nakiravalisia, adpaviedna, pradstaŭniki biełaruskaj alternatyŭnaj muzyki i zorki pop-muzyki pieršaha ešałonu.
Ale hałoŭnaj pryčyna «niedajezdu» muzykantaŭ alternatyŭnych nakirunkaŭ u inšym. Arhanizatary «Bazaru» adrazu zrabili staŭku na nastalhiju pa savieckamu minułamu, a taksama na rasijskuju pop-muzyku. Hetaj kancepcyi jany prytrymlivajucca dahetul.
Chto vystupić na sioletnim fiestyvali? Imiony niekatorych vykanaŭcaŭ źnikli z afišy, naprykład, Alaksandra Bujnova, Iryny Biłyk, Michaiła Hałuściana, Natalli Karalovaj i inšych. Artystam pisali ŭ sacsietkach, kab tyja nie ŭdzielničali ŭ fiestyvali, tamu što takim čynam jany padtrymlivajuć uładu, jakaja represiruje biełarusaŭ. Ale šmat chto ź ich kaleh paćvierdziŭ svoj udzieł.
U prahramie adkryćcia, jakoje adbudziecca zaŭtra, 15 lipienia, Tamara Hvierdcyteli, Łarysa Dolina, Stas Pjecha, Mikałaj Baskaŭ, Anita Coj, Alena Vajenha, Taisija Pavalij, Alaksandr Saładucha i inšyja.
Na kancercie-zakryćci płanujuć vystupić hrupa «Fabryka», Ihar Karnieluk, Mikałaj Naskoŭ, Alaksandr Panajotaŭ i inšyja.
Adbudziecca solny kancert Hryhoryja Lepsa, vystupić «Chor Tureckaha».
Jakaja situacyja z kvitkami? Jany pradavalisia prykmietna horš, čym letaś. Arhanizatary dvojčy abjaŭlali pra źnižkak, była infarmacyja, što padciahvali prafsajuzy. U vyniku na ŭračystaje adkryćcio amal usie kvitki razyšlisia. Ale i na zakryćcio, i na kancert «Załaty chit», i na inšyja imprezy volnyja miescy jość.
