Paśla pažaru ŭ Notr-Damie ŭ vakolicach vyjavili śvincovaje zabrudžvańnie
Vakoł budynka nazirajecca niebiaśpiečny ŭzrovień taksičnaha pyłu.
Šostaha lipienia ŭładam Francyi i Paryža byŭ pradjaŭleny sudovy isk. Pryčyna — niebiaśpiečny ŭzrovień śvincovaha pyłu vakoł sabora na fonie nastupstvaŭ razburalnaha pažaru dvuchhadovaj daŭnaści.
Sprava pradstaŭlenaja na razhlad jurystami adnaho z macniejšych prafsajuzaŭ krainy, a taksama asacyjacyjaj pa achovie zdaroŭja i miascovymi žycharami. Istcy abvinavačvajuć ułady ŭ tym, što jany nie adreahavali na ryzyku zabrudžvańnia terytoryi śvincom i ŭ vyniku padvierhli žyćci ludziej niebiaśpiecy, piša france24.com.
Zhodna ź istcami, 15 krasavika 2019 hoda, kali ŭ sabory zdaryŭsia pažar, 400 ton śvinca ź jaho dachu byli raspłaŭlenyja ci raśsiejanyja nad francuzskaj stalicaj u vyhladzie mikračaścinak. U vyniku niebiaśpiecy padvierhlisia dzieci ŭ dziciačych sadach i škołach, supracoŭniki i prostyja ludzi, jakija žyvuć niedaloka ad Notr-Dama.
Istcy padkreślivajuć, što, niahledziačy na pamier pažaru i viedańnie pra ryzyku zabrudžvańnia, na praciahu bolš čym troch miesiacaŭ paśla zdareńnia ŭłady ničoha nie pradprymali, kab abaranić ludziej. Tolki praź niejki čas paśla pažaru ŭłady vyčyścili ad pyłu terytoryi škoł, što znachodziacca blizka da sabora. Dzieci i ciažarnyja žančyny, jakija žyvuć niedaloka ad miesca zdareńnia, byli pavinnyja taksama zdać analiz kryvi. U mai hetaha hoda praz vysoki ŭzrovień taksičnych śvincovych čaścinak dla naviedvalnikaŭ była zakrytaja płošča pierad saboram.
