Biełaruski dyryžor Alaksandr Chumała staŭ mastackim kiraŭnikom Krakaŭskaj fiłarmonii
Krakaŭskaja fiłarmonija imia Karala Šymanoŭskaha abviaściła, što jaje novym mastackim kiraŭnikom stanovicca biełaruski muzykant Alaksandr Chumała. Da 2019 hoda jon pracavaŭ u Biełarusi i źjaŭlaŭsia hałoŭnym dyryžoram muzyčnaj kapeły «Sanorus». Kapeła maje status zasłužanaha kalektyva, jaki atrymała praz dva hady paśla prychodu Alaksandra na pasadu.
«Z Krakaŭskaj fiłarmonijaj ja supracoŭničaju ŭžo davoli daŭno. Moj pieršy kancert ź jaje simfaničnym arkiestram adbyŭsia ŭ 2015 hodzie: my tady rabili premjeru čaćviortaj simfonii Chienryka Hureckaha, jakuju znajšli paśla jaho śmierci. Potym ja kožny hod vystupaŭ z hetym arkiestram jak zaprošany dyryžor, adnojčy my navat źjeździli ŭ tur, a padčas pandemii zrabili anłajn-kancert. Ja pryniaŭ prapanovu fiłarmonii, kali zrazumieŭ, što ŭžo nie viarnusia ŭ «Sanorus». Da taho ž hienieralny dyrektar skazaŭ, što heta pieradusim žadańnie muzykantaŭ — jak tut admović».
U 2019 hodzie Alaksandr Chumała syšoŭ z pasady hałoŭnaha dyryžora «Sanorusa» i pajechaŭ u Krakaŭ vučycca ŭ Jahiełonskim univiersitecie «stratehičnamu menedžmentu ŭ kultury».
«Spačatku ja płanavaŭ syści na čas vučoby, to-bok na hod. Jašče sioleta ja vystupaŭ z «Sanorusam» jak zaprošany dyryžor i chacieŭ tudy viarnucca. Ale ŭ krasaviku zrazumieŭ, što nazad darohi, na žal, niama: dyrektarka dała zrazumieć, što ŭ maich pasłuhach kapeła bolš nie maje patreby. Tym nie mienš ja pravioŭ z «Sanorusam» cudoŭnyja piać hadoŭ svajho žyćcia, heta maja sapraŭdnaja siamja, my vielmi šmat dasiahnuli razam. U nas było stolki roznych prajektaŭ, pajezdak. Ja ŭpeŭnieny, u kapeły bliskučaja budučynia».
Alaksandr Chumała na pres-kanfierencyi, dzie jaho pradstavili jak mastackaha kiraŭnika fiłarmonii.
Ci stała novaja pasada ŭ Krakaŭskaj fiłarmonii vyklikam? «Tak, heta vialiki vyklik, biez žartaŭ: heta adna z najlepšych fiłarmonij u Polščy, da taho ž u takim histaryčnym horadzie. Uvohule jak pahladziš, chto tut pracavaŭ i chto byŭ hałoŭnym dyryžoram, — peŭny tremar i pieražyvańnie, ci ja spraŭlusia, uźnikajuć. U fiłarmonii davoli razhalinavanaja struktura — tut simfaničny arkiestr, vialiki chor, dziciačy chor, prafiesijny arhan, nievialikija hrupy salistaŭ. Ja ŭžo mocna ŭva ŭsio ŭnikaju i buduju niejkuju sumiesnuju budučyniu».
***
Alaksandr Chumała atrymaŭ adukacyju ŭ Biełaruskaj dziaržaŭnaj akademii muzyki i Raterdamskaj kansiervatoryi ŭ Niderłandach. Stažyravaŭsia ŭ Italjanskaj opiernaj akademii ŭ Ravenie. Źjaŭlajecca mahistram mastactvaznaŭstva, łaŭreatam mižnarodnych konkursaŭ dyryžoraŭ, uładalnikam premij i ŭznaharod u roznych krainach śvietu. Pracuje ź viadučymi muzyčnymi kalektyvami i opiernymi teatrami Jeŭropy i Rasii. Padčas pracy ŭ Biełarusi prapahandavaŭ sučasnuju biełaruskuju muzyku.
