Navukoviec nazvaŭ zachvorvańnie, jakoje źnižaje vierahodnaść zaražeńnia karanavirusam
Pacyjenty z alerhijaj radziej chvarejuć na COVID-19, z hetaj nahody navukoŭcy vykazvajuć roznyja hipotezy, zajaviŭ «RIA Naviny» dyrektar Instytuta imunałohii FMBA Rasii Musa Chaitaŭ.
«Ad pačatku pandemii prajšło paŭtara hoda, ale z samaha pačatku źjavilisia źviestki, što pacyjenty z alerhijaj radziej chvarejuć na karanavirusnuju infiekcyju», — skazaŭ Chaitaŭ.
Jon adznačyŭ, što, pavodle zamiežnych daśledavańniaŭ, dla chvorych na alerhičnuju branchijalnuju astmu karanavirus nie źjaŭlajecca faktaram, jaki ŭzmacniaje ryzyku ciažkaha raźvićcia chvaroby.
«Z čym heta źviazana, pakul skazać składana, vykazvajucca roznyja hipotezy, ale jany patrabujuć paćviardžeńnia», — udakładniŭ Chaitaŭ.
Raniej Chaitaŭ paraiŭ alerhikam pryščaplacca ad karanavirusa ŭ stadyi remisii.
Brytanskija daśledčyki raniej vyjavili čatyry prykmiety COVID-19, jakija čaściej za ŭsio sustrakajucca ŭ pryščeplenych pacyjentaŭ.
Pavodle ZOE COVID Symptom Study — najbujniejšaha dadatku dla daśledavańnia i adsočvańnia simptomaŭ karanavirusa, — u pacyjentaŭ, jakija atrymali abodva kampanienty vakcyny, pašyranyja hałaŭny bol, nasmark, čchańnie i bol u horle. U tych, chto atrymaŭ tolki pieršuju dozu vakcyny, akramia čatyroch pieraličanych simptomaŭ, sustrakajecca taksama kašal.
Daśledčyki padkreślili, što vakcyna nie daje stoadsotkavaj abarony ad karanavirusa, adnak značna źnižaje ryzyku ciažkaj płyni chvaroby. Tak, raniejšyja «tradycyjnyja» prykmiety chvaroby — strata niuchu, dychavica i lichamanka — sustrakajucca ŭ pryščeplenych pacyjentaŭ davoli redka.
